Meta s-Sibt jitla’ s-siparju tas-Serie A, iċ- champions Milan jibdew id- difiża tagħhom f’darhom kontra Udinese.
Bla dubju, iż-żewġ sfidanti ewlenin se jkunu Inter u Juventus hekk kif n-Nerazzurri jmorru jilagħbu għand Lecce filwaqt li Juventus jospitaw lil Sassuolo.
Min-naħa ta’ Roma, dawn mistennija jkunu outsiders wara li f’dawn l-aħħar ġimgħat huma saħħew l-iskwadra tagħhom.
Milan v Udinese – Milan jibdew id-difiża tat-titlu b’logħba delikata kontra Udinese.
It-team immexxi minn Stefano Pioli huwa konxju li se tkun diffiċli biex jirrepeti s-suċċess tal-istaġun li għadda fejn spikka l-kollettiv.
Ir-Rossoneri saħħew l-iskwadra tagħhom bl-akkwisti ta’ Alessandro Florenzi, Divock Origi, De Ketelaere, Yacine Adli filwaqt li d-diriġenti tal-club qed jiddiskutu t-tiġdid ta’ Rafael Leao.
Min-naħa tagħhom, Udinese ħadu diversi players mhux daqstant magħrufa għalkemm xorta se jippruvaw jagħtu sfida lill-avversarji tagħhom.
Huma ħatru wkoll coach ġdid, Andrea Sottil, fit-tentattiv li jtaffu d-diżappunt tal-istaġun li għadda fejn setgħu jispiċċaw biss fit-12-il post tal-klassifika.
Milan m’għandhom l- ebda problemi filwaqt li Udinese għandhom neqsin lill-imweġġgħin Torglay Arslan u Leonardo Buta.
Lecce v Inter – Inter iridu jinsew id-diżappunt tal-istaġun li għadda meta kien lejn it-tmiem li ċedew l-armi hekk kif kienu l-aktar favoriti li jirbħu l-kampjonat.
Huma jibdew din il-maratona għand it-team promoss ta’ Lecce fejn jimmiraw għal bidu pożittiv.
Għan-Nerazzurri jirritorna l-iskorer prolifiku Romelu Lukaku, li wara l-esperjenza xejn sabiħa ma’ Chelsea, reġa’ jinsab jilgħab fi Stadio San Siro. Magħhom ingħaqdu wkoll Henrikh Mkhitaryan, Dalbert Henrique u l-goalkeeper Andre Onana.
Lecce għandhom l-għan li jissieltu sabiex iżommu posthom fl-ogħla diviżjoni Taljana fejn fost l-iktar akkwist attraenti li għamlu kien Gianluca Frabotta mingħand Juventus.
Il-coach ta’ Inter, Simone Inzaghi, m’għandux problemi ta’ players imweġġgħin iżda l-kontraparti tiegħu, Marco Baroni, se jkollu jgħaddi mingħajr Johann Elgason, Alessandro Tuia u Kastriot Dermaku li qed jirkupraw minn injury.
Juventus v Sassuolo – Juventus jittamaw li jkollhom staġun ferm aħjar minn dak preċedenti.
L-ewwel impenn tagħhom hu dak f’darhom kontra Sassuolo.
Il-Bianconeri kienu attivi f’dan is-suq tat-trasferimenti meta reġgħu kisbu lura lil Paul Pogba mingħand Manchester United għalkemm bħalissa jinsab imweġġa’. Fl-istess waqt ħadu wkoll lil Angel di Maria, Filip Kostic u Geison Bremer.
Sassuolo wkoll kellhom staġun diżastruż u għalhekk iridu jpattu għal dan id-diżappunt.
Huma għadhom kemm akkwistaw lil Andrea Pinamonti mingħand Inter fost l-iktar akkwisti prestiġjużi li għamlu.
Il-coach ta’ Juventus Massimiliano Allegri għandu numru ta’ players li jinsabu barra mill-azzjoni fosthom Adrien Rabiot, Wojciech Szczesny, Paul Pogba, Kaio Jorge u Federico Chiesa.
Min-naħa tagħhom, Sassuolo għandhom lill-players kollha għad-disposizzjoni tal-coach Alessio Dionisi.
Salernitana v Roma – Roma jmorru għand Salernitana f’partita li hija meqjusa delikata.
Ir-Romanisti jimmiraw li jkomplu fejn ħallew fl-istaġun li għadda hekk kif saru l-ewwel team li rebħu l-kompetizzjoni tal-UEFA Conference League.
Taħt it-tmexxija tal-coach, José Mourinho, huma akkwistaw lil Paulo Dybala, Nemanja Matic u Georginio Wijnaldum fost l-akkwisti li għamlu … li jagħmluhom outsiders għar-rebħ tat-titlu.
Fil-każ ta’ Nicoló Zaniolo, dan kien qed jissemma’ li seta’ jingħaqad ma’ Tottenham iżda Mourinho mblokka dan it-trasferiment. Huwa se jkollu l-iskwadra kollha għad-dispożizzjoni.
Verona v Napoli – Napoli jilagħbu barra minn darhom kontra Verona fejn se jippruvaw jiksbu l-ewwel tliet punti ta’ dan l-istaġun.
It-team immexxi minn Luciano Spalletti jinsabu attivi ferm f’dan is-suq tat-trasfermenti tas-sajf meta akkwistaw lill-goalkeeper Salvatore Sirigu, Leo Ostigard u Kim min-Jae.
Il-coach Spalletti daħħal filosofija ġdida fil-club fejn se jibbaża fuq il-kollettiv aktar milli fuq ismijiet partikolari.
Verona jittamaw li jkunu sfida denja għall-Partenopei fejn kisbu wkoll diversi players bl-aktar prominenti jkunu Milan Djuric u Mert Cetin.
Napoli għandhom lil Matteo Politano imweġġa’ filwaqt li Verona għandhom l-iskwadra kollha għad-dispożizzjoni.
