Meta tintlagħab is-27 ġurnata tas-Serie A, l-aktar partita li se tiġbed attenzjoni hija dik bejn Inter u Juventus liema konfront huwa meqjus bħala d-”Derby tal-Italja” minħabba r-rivalitá li teżisti bejn iż-żewġ timijiet.
Bla dubju, din il-partita għandha l-importanza tagħha minħabba li filwaqt li Inter qed jisfidaw għat-tieni post, teżisti possibbiltá li Juventus għandhom l-istess objettiv.
Dan minħabba li fil-ġimgħat li ġejjin se jingħata l-verdett tal-appell li Bianconeri ssottomettew wara li tnaqqsulhom 15-il punt wara rregolaritajiet fil-kotba finanzjarji tagħhom.
Jekk jiġri hekk, huma għandhom ċans kbir li jispiċċaw fit-tieni post. Iżda għalissa jkollhom jikkuntentaw bis-seba’ post u jinsabu 10 ‘l bogħod mir-raba’ pożizzjoni.
Rebħa għalihom tpoġġihom disa’ punti taħt l-istess Inter.
Inter se jkollhom barra lil Robin Gosens filwaqt li Juventus ma jistgħux jinkludu lis-sospiż Moise Kean u l-imweġġħin Paul Pogba, Angel Di Maria, Alex Sandro, Federico Chiesa, Kaio Jorge u Arkadiusz Milik.
Torino v Napoli – Napoli jmorru għand Torino bil-għan li jżommu t-18-il punt vantaġġ f’ras il-klassifika u jagħmlu pass ieħor lejn ir- rebħ tat-titlu.
Jidher li bħalissa ħadd ma jista’ jwaqqaf lill-Partenopei u jinżlu għal dan il-konfront b’moral għoli hekk kif ġejjin minn rebħa ta’ 3-0 fuq Eintracht Frankfurt biex ikkwalifikaw għall-kwarti-finali tal- UEFA Champions League.
Iżda huma se jkollhom jgħaddu mingħajr l-imweġġgħin Marco Rui u Giacomo Raspadori filwaqt li l-Granata ma jistgħux jinkludu lil Ronaldo Vieira, Nikola Vlasic, David Zima u Valentino Lazzaro għall-istess raġuni.
Udinese v Milan – Barra minn darhom Milan jiffaċċjaw lil Udinese f’dik li hija meqjusa bħala partita deliskata.
Għaldaqstant xejn għajr minn rebħa ma tissodisfa l-kriterji tagħhom meta ġejjin minn telfa kontra Fiorentina (2-1) u draw kontra Salernitana (1-1).
Ir-Rossoneri għandhom lil Olivier Giroud sospiż filwaqt li Junior Messias qed jirkupraw minn injury.
Min-naħa tal-Friulani, Enzo Ebosse u Gerard Delofeu se jkunu neqsin għax jinsabu mweġġgħin.
Salernitana v Spezia – Il- bieraħ intlagħbet il-partita bejn Salernitana u Spezia bit-team ospitu joħroġ rebbieħ bl-iskor ta’ 1-0. L-uniku goal ta’ dan il-konfront wasal fil-71 minuta minn penalty mogħti minn Domenico Berardi.
