Hekk kif tintlagħab it-32 ġurnata tas-Serie A, l-attenzjoni tibqa’ dejjem fuq il-leaders Inter meta jospitaw lit-team minn Sardinja ta’ Cagliari.
Dan minħabba li meta fadal seba’ partiti għal tmiem l-istaġun, huma jonqoshom tmien punti biex jirbħu l-20 Scudetto fl-istorja tal-club.
Barra minn hekk, jintlagħab ukoll id-Derby Delle Mole bejn Torino u Juventus.
Peró jekk fil-passat dan il-konfront kien jisraq ix- xena, illum tilef mill-interess tiegħu minħabba li Torino m’għadhomx daqstant kompetittivi.
Inter v Cagliari – Inter jibdew favoriti li jieħdu t-tliet punti meta jospitaw lil Cagliari.
L-Interisti ġejjin minn rebħa diffiċli ta’ 2-1 kontra Udinese bil-goal tar-rebħa jasal proprju fil-95 minuta minn Davide Frattesi.
Huma se jilagħbu kontra team li jinsab erba’ punti fuq iż-żona tar-relegazzjoni u għaldaqstant jimmiraw li jieħdu xi ħaġa minn din il-partita.
L-aħħar rebħa ta’ Cagliari f’San Siro kienet eżattament fis-16 ta’ Ottubru, 2016, bl-iskor ta’ 2-1.
Inter ma jistgħux jinkludu lil Lautaro Martinez u Benjamin Pavard li huma sospiżi filwaqt li Alessandro Bastoni, Stefan de Vrij u Juan Cuadrado qed jirkupraw minn injury.
Cagliari għandhom barra lil Nahitan Nandez u Alessandro Deiola li huma sospiżi filwaqt li Andrea Petagna, Leandro Pavoletti u Marco Mancuso huma mweġġgħin.
Torino v Juventus – Torino, li jinsabu fid-disa’ post tal-klassifika, jilqgħu lir-rivali eterni, Juventus, liema konfront iqanqal nostalġija kbira għall-players leġġendarji li kienu jilagħbu f’dan id-derby.
L-aħħar darba li Torino għelbu lil Juventus, f’darhom, kien fis-26 ta’ April, 2015, bl-iskor ta’ 2-1.
Barra minn hekk, il-Bianconeri jistgħu jiftaħru li għandhom rekord aħjar meta rreġistraw 35 rebħa kontra d-19 tal-Granata.
Juventus jimmiraw li jkomplu jibnu fuq ir-rebħa ta’ 1-0 fuq Fiorentina wara żewġ telfiet u żewġ draws … bil-konsegwenza li ċedew ukoll it-tieni post.
Juventus se jkollhom lil nieqes lil Arkadiusz Milik li għandu fastidju muskolari filwaqt li Torino ma jistgħux jagħmlu użu minn Gvidas Gineidis, Koffi Djidji, Ivan Ilic u Alphonse D’Guessan li kollha huma mweġġgħin.
Sassuolo v Milan – Milan imorru jilagħbu għand Sassuolo fejn jimmiraw li jsaħħu t-tieni pożizzjoni.
It-team immexxi minn Stefano Pioli ġej minn seba’ rebħiet fl-aħħar tmien partiti f’kull kompetizzjoni u għalhekk il-moral hu għoli.
Huma se jilagħbu kontra team li jinsab fil-post ta’ qabel l-aħħar.
Ir-Rossoneri se jkollhom jgħaddu mingħajr Malik Thiaw, Pierre Kalulu, Alex Jimenez u Tommaso Pobega minħabba li qed jirkupraw minn injury.
