Meta tintlagħab is-36 ġurnata tas-Serie A, il-leaders Napoli jistgħu jagħmlu pass kbir lejn ir- rebħ tal-Iscudetto.
Dan minħabba li filwaqt li huma se jilqgħu lil Genoa, Inter imorru jilagħbu għand Torino liema konfront qed jitqies bħala wieħed delikat.
Napoli v Genoa – Hekk kif fadal tliet partiti għat- tmiem il-poplu Naplitan jinsab f’”festa” konxju mill-fatt li jekk it-team tagħhom jegħleb lil Genoa, huma jagħmlu pass kbir lejn ir- rebħ tat-titlu.
Huma se jilagħbu kontra team li jinsab fit-13-il post mingħajr l-ebda periklu tar- relegazzjoni.
Peró, il-Partenopei jridu juru rispetti massimu lejn l-avversarji tagħhom biex iżommu t-tliet punti vantaġġ fuq Inter filwaqt li jittamaw li n-Nerazzurri jiżolqu kontra Torino.
Barra minn hekk, Napoli jimmiraw li jkomplu bis- sensiela pożittiva meta mill-aħħar tmien partiti kisbu 20 punt … bl-aħħar telfa tmur lura għat-23 ta’ Frar, meta sfaw megħluba 2-1 minn Como.
Huma ma jistgħux jinkludu lil Stanislav Lobotka, Alessandro Buongiorno, Juan Jesus, Jesper Lindstroem u David Neres minħabba li kollha qed jirkupraw minn injury.
Torino v Inter – Wara s- suċċess kbir fis-semi-finali tal-UEFA Champions League li f’konfront spettakolari għelbu lil Barcelona bl-iskor ta’ 4-3 u b’aggregate ta’ 7-6, Inter jivvaġġjaw lejn Turin biex jaffrontaw lil Torino.
Bla dubju, in-Nerazzurri jinżlu għal din il-partita b’moral għoli iżda l-Granata jistgħu japprofittaw mill-għejja fiżika u mentali ta’ Inter wara li fil-partita kontra l-Katalani huma lagħbu 120 minuta minħabba li partita kellha tmur fil-ħin barrani.
Iżda minkejja li l-prijoritá ta’ Inter hija l-finali tal- aqwa kompetizzjoni Ewropea, huma ma jridux iwaqqgħu l-punti f’dan l-istadju l-aktar kruċjali.
Inter ma jistgħux jutlizzaw lill-imweġġgħin – Sebastiano Esposito, Hakan Calhanoglu, Benjamin Pavard, Valentin Carboni u Zinho Vanheusden.
Lazio v Juventus – Dan huwa konfront dirett u importanti għall-kwalifikazzjoni għall-UEFA Champions League.
Rebħa biss tissodisfa l-kriterji ta’ dawn iż-żewġ timijiet konxji mill-fatt li Atalanta, li jinsabu fit-tieni post, se jospitaw lil Roma li għandhom punti daqs l- istess Juventus u Lazio filwaqt li Bologna, li għandhom punt inqas, lagħbu tard il-bieraħ filgħaxija.
Il-pressjoni tinsab fuq it-timijiet kollha għax hekk kif fadal disa’ punti għat- tmiem, min ifalli jiġi “eliminat” mill-ewwel erbgħa.
