Matul l-2024, Servizz.gov irċieva aktar minn 2.6 miljun talba għal servizz jew informazzjoni relatati ma’ servizzi pubbliċi, żieda ta’ 400,000 interazzjoni meta kkumparat mas-sena preċedenti. Dan tħabbar mill-Kap tas-Servizz Pubbliku Tony Sultana u l-Kap Eżekuttiv Massimo Vella waqt it-tnedija tar-rapport annwali tal-aġenzija.
Mill-pubblikazzjoni tar-Rapport Annwali jirriżulta li ż-żieda fis-servizzi mogħtija hija mifruxa fuq kull pjattaforma ta’ Servizz.gov.
Fil-fatt, il-Freephone Servizz.gov 153 kompla jafferma ruħu bħala l-aktar freephone popolari f’pajjiżna b’1,128,509 telefonata – żieda ta’ 31%. Is-sit elettroniku servizz.gov.mt kellu 977,380 viżitatur – żieda ta’ 11%. Fl-istess perjodu, 75,764 persuna nqdew biċ-Chatbot u 107,115 użaw l-emails, b’żidiet ta’ 23% u 24% rispettivament. Aktar minn 332,000 persuna ppreferew assistenza wiċċ imb wiċċ billi żaru l-25 ċentru reġjonali u 2 ċentri speċjalizzati li Servizz.gov għandu mal-pajjiż, żieda ta’ 15% fuq l-2023. L-aktar ċentri ffrekwentati kienu ċ-ċentru speċjalizzat tat-Taxxa fil-Furjana, u ċ-ċentri reġjonali tal-Ħamrun u San Pawl il-Baħar.
Il-Kap tas-Servizz Pubbliku Tony Sultana stqarr li dawn iċ-ċifri huma xhieda li kull sena li tgħaddi Servizz.gov qed isir dejjem aktar popolari u mfittex mill-poplu Malti. Filwaqt li rringrazzja lill-impjegati kollha ta’ Servizz.gov, qal li s-Servizz Pubbliku jibqa’ kommess li jkompli joffri l-investiment u r-riżorsi kollha possibbli biex l-aġenzija tibqa’ tipprovdi servizz immedjat lill-klijenti tiegħu.
Il-Kap Eżekuttiv Massimo Vella spjega li fl-2024 l-operat tal-aġenzija kompla jikber, b’aktar servizzi governattivi jingħaqdu mal-pjattaformi ta’ Servizz.gov. Qal li Servizz.gov sar aktar data-driven, b’informazzjoni utli li tgħina nagħtu lill-klijent dak li jixtieq mingħajr telf ta’ ħin. Hu ddeskriva l-2024 bħala waħda ta’ suċċess li fiha rat aktar immodernizzar ta’ ċentri, tnediet dehra u identità ġdida, u sar aktar investiment f’għodod diġitali inkluż bl-assistenza tal-Intelliġenza Artifiċjali.
Ir-Rapport Annwali 2024 ta’ servizz.gov jista’ jitniżżel b’mod diġitali minn hawn: https://www.flipsnack.com/EABCD999E8C/rapport-annwali-2024/full-view.html.
