Ilbieraħ waranofsinhar, għall-ħabta tal-4.00pm, il-Pulizija ġiet infurmata li kien hemm bżonn l-assistenza fi Triq Ħal Luqa, Raħal Ġdid.
Il-Pulizija marret mill-ewwel fuq il-post u hemmhekk irriżulta li kien seħħ inċident bejn mutur Romet motors Vanilla 110 misjuq minn raġel ta’ 67 sena residenti l-Belt Valletta u Honda Civic misjuqa minn raġel ta’ 37 sena residenti Ħal Tarxien.
Is-sewwieq tal-mutur ingħata l-assistenza minn tim mediku, ittieħed l-Isptar Mater Dei b’ambulanza, fejn aktar tard kien iċċertifikat bi ġrieħi gravi.
L-investigazzjonijiet tal-Pulizija dwar dan l-inċident għadhom għaddejjin.