Dalgħodu, għall-ħabta tal-10:30 a.m, il-Pulizija ġiet infurmata li seħħ inċident ġo garaxx fi Triq San Martin, iż-Żurrieq.
Minn stħarriġ preliminari rriżulta li Sirjan ta’ 16 sena u residenti iż-Żurrieq stess, weġġa’ wara li waqa’ minn fuq sellum.
Huwa ngħata l-għajnuna minn tim mediku u ttieħed l-Isptar Mater Dei b’ambulanza. Aktar tard ġie ċċertifikat li weġġa’ gravi. Membri mid-Dipartiment tal-Protezzjoni Ċivili kienu wkoll fuq il-post sabiex jassistu. L-investigazzjonijiet tal-Pulizija għadhom għaddejjin.
