Uffiċjali Ukreni qalu li mill-inqas sitt persuni nqatlu u diversi oħra ndarbu wara li persuna fetħet in-nar fuq in-nies fi Kyiv.
L-inċident seħħ is-Sibt li għadda fid-distrett tan-nofsinhar ta’ Holosiivskyi. Il-Ministru tal-Intern tal-Ukrajna Ihor Klymenko qal li l-aggressur, li kien jgħix fil-pajjiż, beda jispara fuq in-nies fit-triq u mbagħad ħa oħrajn bħala ostaġġi f’supermarket fil-qrib.
Klymenko qal li l-aggressur inqatel fis-supermarket wara sparatura mal-pulizija. Il-motiv wara dan l-attakk għadu mhux ċar.
In-numru eżatt tal-vittmi għadu mhux ċar, iżda l-President Ukren Volodymyr Zelensky qal li ndarbu xejn inqas minn 14-il persuna, inkluż tifel ta’ 12-il sena.
Huwa qal li erba’ persuni nqatlu fit-triq filwaqt li mara, li hija maħsuba li kellha madwar 30 sena, mietet aktar tard fl-isptar. Ġie rrapportat ukoll li l-aggressur qatel ukoll wieħed mill-ostaġġi.
Klymenko qal li l-pulizija kienu tkellmu mal-aggressur għal madwar 40 minuta waqt li kien fis-supermarket. Huwa ddeskriva lir-raġel bħala li “kien qed jaġixxi b’mod kaotiku”. “Ippruvajna nipperswaduh, meta rrealizzajna li kien hemm persuna midruba hemmhekk,” spjega, u żied jgħid li l-aggressur ma kien għamel l-ebda talba.