Hibernians ……..0
Sliema Wdrs …..1
Wara t-telfa kontra Floriana, Sliema Wanderers, irritornaw għar-rebħ meta għelbu lil Hibernians bl-iskor ta’ 1-0 biex dawn tal-aħħar komplew jikkonfermaw staġun mill-aktar diżappuntanti.
Kienet rebħa meritata għall-Wanderers, bl-iskor seta’ kien saħansitra akbar hekk kif fost oħrajn laqtu l-wieqfa, proprju żewġ minuti biss qabel irnexxielhom jiskorjaw il-goal tar-rebħa.
Huma dehru impostati ferm tajjeb fil-ground minn kull lat, b’Hibernians, b’kuntrast għal dan iddiżappuntaw għall-aħħar fejn naqsu milli jkunu avventurużi, hekk kif ħolqu azzjoni waħda biss denja ta’ nota matul id-90 minuta li minnha sabu x-xibka avversarja, iżda l-goal ġie mħassar minħabba li ġie ġġudikat foul fil-proċess.
Kien biss fid-19-il minuta li waslet l-ewwel azzjoni denja ta’ nota, bi Sliema Wanderers, ikunu huma li joħolqu l-periklu meta freekick ta’ Joseph Minala, intemm ftit għoli.
Huma komplew fuq l-offensiva u fis-27 minuta Vito Plut kellu xutt djagonali minn ġol-kaxxa li falla l-mira.
Hibernians wieġbu fil-45 minuta u kellhom ferħa bla temma meta Rodney Antwi ġie wiċċ imb’wiċċ mal-goalkeeper tal-Wanderers, Rashed al Tumi, u tefa’ ġewwa iżda r-referee Alex Johnson innota foul min-naħa tal-istess Antwi u b’hekk il-goal ma ġiex konvalidat.
Fit-tieni taqsima, Sliema bdew jipproduċu l-isbaħ logħob u fil-65 minuta, kienu sfortunati li ma fetħux l-iskor meta l-iskorer prolifiku Sloven, Vito Plut, kellu x-xutt tiegħu jistampa mal-wieqfa, bil-Pawlisti jeħilsuha ħafif.
Iżda huma ma kellhomx jiġu mċaħħda, żewġ minuti biss wara meta x-xutt ta’ DENIS KOUAO ma ta l-ebda ċans lill-goalkeeper Pawlist, Ibrahim Kone, isalva bil-ballun jintemm fir-rokna tax-xibka.
Wara dan il-goal, wieħed stenna li Hibernians jagħmlu reazzjoni iżda l-Wanderers ikkontrollaw sal-aħħar.
HIBERNIANS: 24-Ibrahim Kone, 3-Ferdinando Apap, 5-Kurt Shaw, 8-Robert Bairam (13-Zachary Grech 73), 10-Jurgen Degabriele, 11-Bjorn Kristensen, 21-Alex da Silva Souza, 22-Gabriel Izquier Artiles (7-Ayrton Attard 82), 23-Claudio Bonanni, 29-Giannis Bastianos, 77-Rodney Antwi (9-Armen Hovhannisyan 73) – Coach: Branko Nisevic
SLIEMA W.: 22-Rashed Al Tumi, 2-Jean Borg, 6-Joseph Marie Minala, 9-Vito Plut (70-Lydon Micallef 91), Myles Beerman, 15-Gustavo Alcino, 18-Edmond Agius (8-Mark Scerri 73), 20-Denis Koauau, 25-Joachim Adukor (39-Samuel Gomes Da Mata 60), 31-Henrique Freire, 33-Geoffrey Edwin Acheampong – Coach: Paul Zammit
REFEREE: Alex Johnson
ASS. REFEREES: Roberto Vella, David Castillo
RABA’ UFF: Slobodan Petrovic
SKORER: D. Kouauo 67 (SW)
AMMONITI: F. Apap, R. Bairam, A. Bruno Da Silva Souza (H), H. Freire, G. E. Achempong (S)
