Id-Deputat Prim Ministru u Ministru tas-Saħħa Chris Fearne f’konferenza tal-aħbarijiet tkellem ukoll dwar il-kwistjoni Ukrajna-Russja u qal li bħala Gvern u poplu Malti jestendu s-solidarjetà mal-poplu Ukren. Huwa qal li l-Ukrajna hi meqjusa bħala pajjiż dark red. Persuni minn pajjiżi dark red, jistgħu jiġu biss jekk ikunu residenti f’Malta jew ikollhom permess tax-xogħol f’pajjiżna.
Fearne spjega li “fil-każ tal-Ukrajna se nagħmlu eċċezzjoni. Se naċċettaw persuni Ukreni li għandhom xi qraba f’pajjiżna, kif ukoll dawk iċ-ċittadini Ukreni kollha li qed ifittxu ażil se jkollhom il-possibilità li r-restrizzjonijiet tal-Covid-19 għall-ivvjaġġar lejn Malta fil-każ tagħhom se jkunu sospiżi ħlief li meta jiġu Malta jkollhom jagħmlu perjodu ta’ kwarantina.”
Minbarra f’dan, huwa qal li l-awtoritajiet Maltin diġà qegħdin fil-proċess biex jibagħtu għajnuna umanitarja kif ukoll biex jilqgħu fiċ-Ċentru tal-Onkoloġija Sir Anthony Mamo xi pazjenti Ukreni li jkollhom bżonn trattament għall-kanċer.
