It-tennista numru wieħed tad-dinja Novak Djokovic infired minn mal-coach tiegħu, Goran Ivanisevic.
L-eks champion ta’ Wimbledon, Ivanisevic, kien inħatar bħala l-coach ewlieni ta’ Djokovic f’Marzu 2022, wara li ħadem miegħu flimkien mal-mentor li kienet ilha żmien twil, Marian Vajda, mill-2018.
Is-Serb Djokovic rebaħ rekord konġunt ta’ 24 titlu tal-Grand Slam iżda din is-sena kalendarja kienet waħda diżappuntanti għalih.
“Ftit tal-jiem ilu, jien u Goran iddeċidejna li nieqfu naħdmu flimkien,” qal Djokovic fuq Instagram.
“Il-kimika tagħna fil-court kellha t-tlugħ u l-inżul tagħha, iżda l-ħbiberija tagħna kienet dejjem soda.”
Djokovic tilef fis-semi-finali tal-Australian Open, f’Jannar li għadda, sofra telfa fit-tielet round min-numru 123 fid-dinja, Luka Nardi, f’Indian Wells dan ix-xahar, imbagħad irtira mill-Miami Open li jinsab għaddej bħalissa, u semma l-ħtieġa li jibbilanċja l-iskeda privata u professjonali tiegħu.
“Niftakar b’mod ċar il-mument meta kont stedint lil Goran biex ikun parti mit-team tiegħi. Kien lura fl-2018, u Marian u jien konna qed infittxu li ntejbu fuq dak li kellna, speċjalment fuq is-service,” qal Djokovic.
“Fil-fatt, mhux biss tejjibna s-service, iżda wkoll sirna ħbieb kbar fejn dħakna u bkejna flimkien … b’mod kollettiv tlajna fl-ewwel post tar-rankings minbarra li ksirna bosta rekords u flimkien irbaħna 12-il Grand Slam u diversi finali ta’ tournaments iżgħar.”
Il-Kroat Ivanisevic kien nominat għall-ATP Coach tas-Sena fl-2023, wara li għen lil Djokovic jikseb tlieta mill-erba’ titli tal-Grand Slam.
Bħalissa, Djokovic qed jaqsam ir-rekord tat-titli tal-Grand Slam flimkien mat-tennista femminili, l-Awstraljana Margaret Court.
Bħalissa, it-tennista Serb qed jipprepara għall-Grand Slam li jmiss fil-kalendarju, il-French Open.
