Iona Hay, tfajla ta’ 18-il sena li tilfet waħda minn riġlejha bħala kawża ta’ kanċer fl-għadam, illum il-ġurnata taħdem bħala mudella ma’ ditti rinomati fil-qasam tal-moda, fosthom Burberry u H&M.
F’Novembru li għadda Iona ġiet avviċinata minn Zebedee Management — aġenzija li tgħin nies b’diżabiltà jisfruttaw it-talenti tagħhom permezz ta’ opportunitajiet — u minn hemm infetħet it-triq tal-immudellar għaliha.
It-tfajla tiddeskrivi l-opportunitajiet li kellha s’issa fl-immudellar bħala “esperjenzi tal-ġenn” u tinsab ħerqana biex tkompli tikseb iktar esperjenza f’dan il-qasam.
Hija tittama li jirnexxilha tkun ta’ ispirazzjoni għal żgħażagħ oħra li jinsabu għaddejjin minn esperjenza simili u targumenta li “Huwa importanti ħafna li ditti kbar fil-qasam tal-moda jħaddnu d-diversità”.
Minkejja li Iona għandha riġel minnhom artifiċjali, dan ma waqqafhiex milli tirnexxi fil-karriera tal-immudellar. Hija saħansitra timmudella biż-żraben għal kull waħda mid-ditti li taħdem magħhom.
