Ilbieraħ, għall-ħabta tas-6:30 p.m., il-Pulizija ġiet infurmata li kien hemm bżonn l-assistenza tagħha fl-inħawi tal-Irdum tal-Iħfar fi Triq Panoramika, Ħad-Dingli.
Il-Pulizija marret mill-ewwel fuq il-post u hemmhekk irriżulta li mara mir-Repubblika Ċeka ta’ 21 sena waqgħet u weġġgħet waqt li kienet qed tipprattika l-isport tal-paragliding.
Minnufih kienu msejħa membri mid-Dipartiment tal-Protezzjoni Ċivili u tim mediku, u flimkien ikkoordinaw operazzjoni sabiex il-vittma tittella’ mill-irdum u tittieħed għal aktar kura fl-Isptar Mater Dei.
Aktat tard, hija ġiet iċċertifikata li sofriet ġrieħi gravi. L-investigazzjonijiet tal-Pulizija għadhom għaddejjin.