Minn Cristian Muscat
Kif bdiet l-imħabba tiegħek lejn il-crossfit?
Minn dejjem kien f’qalbi l-isport. Ta’ etá żgħira kont nipprattika ġinnastika u atletika. Iżjed ‘il quddiem kont nagħmel parti mit-tim nazzjonali tar-rugby u l-weightlifting. Fi żmien ir-rugby sirt familjari mal-crossfit (minħabba ċertu taħriġ li kien ikollna). Mal- ewwel għoġobni u rbatt qalbi miegħu għax jinvolvi ġinnastika li kien wieħed mill-isports l-iżjed għal qalbi fi tfuliti.
X’suċċessi maġġuri ksibt fil-karriera tiegħek sa issa f’dan l-isport li tant tħobb?
F’dan l-isport ili għaxar snin nikkompeti f’kompetizzjonijiet internazzjonali l-ewwel waħda kienet f’Diċembru tal-2014. Irnexxieli nirbaħ podiums f’ħafna minnhom.
L-aktar kompetizzjonijiet kbar dejjem kienu Strenght in Depth ġewwa l-Ingilterra li ġejt fit-tieni post darbtejn 2020 u 2022, il-French Throwdown ġewwa Franza ikkompetejet fiha ħames darbiet u fl-aħħar waħda fl-2024 ġejt fit-tielet post.
Waħda mill-ikbar kompetizzjonijiet li għamilt kienet din is-sena 2025 f’Jannar ġewwa Miami fejn jiena flimkien mat-tim tiegħi ġejna fl-ewwel post fil-kategorijia tagħna. Din kienet l-ewwel darba għalija li kkompetejt ġewwa l-Istati Uniti.
Kif tqis il-livell tal-crossfit f’pajjiżna fil-preżent?
Il-livell tal-crossfit f’pajjiżna żdied ħafna u bosta nies saru jipprattikaw dan l-isport.
Kif qed tħares lejn il-futur tiegħek fil-crossfit?
Fl-aħħar għaxar snin għamilt ħafna kompetizzjonijiet u xorta għadni nieħu pjaċir nikkompeti iżda llum il-ġurnata nħossni li għandi nagħżel iżjed liema kompetizzjonijiet nikkompeti fihom u niffoka fuqhom.
L-isport huwa għal qalbi ħafna u kompetizzjoni nħossha li żżommni b’saħħti mentalment u fiżikament. Għalhekk nipprova nkompli nittrenja biex fiż-żmien li ġej inkun nista’ nikkompeti f’kompetizzjonijiet li huma ta’ valur u importanti għalija.
Għaddi messaġġ finali lil min jixtieq jagħmel karriera ta’ suċċess fil-crossfit.
Il-messaġġ tiegħi huwa li biex ikollok suċċess fil-crossfit dejjem l-ewwel trid tibbaża t-taħriġ tiegħek fuq xogħol ta’ saħħa biex tibni bażi soda.
Trid tittrenja bil-għaqal. Il-Crosssfit huwa vast ħafna u hemm ħafna movimenti kumplessi u jidhru sbieħ imma l-ewwel trid titgħallem it-teknika tajba.
Taħdem fuq kwalitá u mbagħad iżżid l-intensitá b’teknika tajba. Apparti li tiffoka fuq it-taħriġ, wieħed irid jieħu ħsieb ir-‘recovery’ tiegħu.
Tħarreġ biex dejjem tkun l-aħjar verżjoni tiegħek innifsek!
