Il-manager ta’ Chelsea, Thomas Tuchel, ħeġġeġ lil Armando Broja biex “ikompli jitjieb” matul l-esperjenza ta’ self tiegħu ma’ Southampton.
Il-prodott tal-akkademja tal-Blues skorja ħames goals mis-17-il ħarġa tiegħu fil-Premier League, u tant ħalla impressjoni pożittiva li Ralph Hasenhuttl irrikonoxxa li jixtieq jiffirma lill-internazzjonali Albaniż fuq bażi permanenti.
Madankollu, iż-żagħżugħ ta’ 20 sena jippossjedi kuntratt fit-tul fi Stamford Bridge, u jidher li Tuchel bħalissa ma jappoġġja l-ebda deċiżjoni li jinfired minn mal-attakkant.
Waqt li tkellem mal-ġurnalisti f’konferenza stampa, Tuchel qal: “Hu l-plejer tagħna u sejjer tajjeb. Iżda, fl-istess ħin, għadda biss nofs staġun, u jeħtieġ li jkompli jitjieb, u jħalli l-marka tiegħu ma’ Southampton.
“Għandna raġuni għaliex huma plejers tagħna. Għandhom kwalità, għandhom mentalità, u issa qegħdin hemmhekk waħedhom f’ambjenti differenti, clubs differenti, u juru lilhom infushom.”
“Armando qed isir dejjem aħjar. Huwa plejer uniku ħafna b’saħħiet uniċi ħafna fil-logħba tiegħu. Huwa veloċi, robust u skorer mill-aqwa.”
“L-ewwel nett, issa mhux il-mument li niddiskutu dwar is-sajf. Issa, huwa l-mument għalih li jibqa’ kalm u jkompli jitjieb.”
Rapporti ssuġġerew li Chelsea se jieħdu deċiżjoni dwar il-futur ta’ Broja sal-aħħar tal-ġimgħa.