Tifla ta’ tmien snin mietet wara li karozza ħabtet fi skola primarja f’Wimbledon, fil-Lbiċ ta’ Londra.
Il-paramediċi kkuraw 16-il persuna għal ġrieħi li sofrew wara li Land Rover ħabtet fi skola f’Camp Road għall-ħabta tal-10.00 a.m.
Is-sewwieqa, mara ta’ 40 sena, ġiet arrestata fuq suspett li kkawżat il-mewt minħabba sewqan perikoluż.
Bħala parti mill-investigazzjoni tagħha, il-Pulizija qalet li neħħiet ukoll il-Land Rover minn fuq is-sit tal-inċident.
L-iskola hija għall-bniet ta’ bejn l-erba’ u l-11-il sena, b’membru parlamentari lokali jgħid li l-istudenti nġabru għal party ta’ ċelebrazzjoni ta’ tmiem is-sena skolastika fil-ġnien.
Waqt konferenza tal-aħbarijiet, Clair Kelland, kmandant tal-pulziija lokali, qalet li: “Dan huwa żmien diffiċli ħafna għal kulħadd hawn fl-iskola u madwar il-komunità. L-uffiċjali tagħna diġà tkellmu ma’ numru ta’ xhieda u raw il-filmati tas-CCTV.”
John Tucker, President tal-Bord tal-Gvernaturi qal li: “Il-komunità skolastika hija affettwata sew minn din it-traġedja.”
