Investigazzjonijiet intensivi u tfittxijiet mill-Pulizija wasslu biex instabet il-karozza li allegatament kienet involuta f’inċident li seħħ fit-2 ta’ Lulju, 2023, fi Triq l-Imdina, Birkirkara.
F’dan l-inċident, Finlandiż ta’ 41 sena allegatament intlaqat minn karozza li telqet minn fuq il-post.
Il-karozza, tal-għamla Toyota Belta tal-lewn abjad, instabet mill-Pulizija fejn fuqha ġew innotati daqqiet kompatibbli mal-inċident imsemmi. Il-karozza tinsab f’idejn il-Pulizija għal aktar investigazzjonijiet, waqt li għadha għaddejja tfittxija għall-allegat sewwieq.
Intant, il-kundizzjoni tal-vittma qalbet għall-aħjar u ġie rilaxxat mill-isptar.
L-investigazzjonijiet tal-Pulizija u l-Inkjesta Maġisterjali dwar dan il-każ għadhom għaddejjin.
