Il-Ministeru għal Għawdex u l-Ippjanar, permezz tad-Direttorat għall-Wirt Kulturali, għal sena oħra ħejja programm vast ta’ attivitajiet għal żmien il-Milied. Dan il-programm fetaħ uffiċjalment is-Sibt 30 ta’ Novembru bl-ispettaklu Christmas It’s Time Milied mit-Tliet Għoljiet u se jibqa’ għaddej sas-6 ta’ Jannar 2025.
L-avveniment li ttella’ fit-Teatru Astra bl-involviment ta’ Ray Calleja, Daniel Cauchi u l-Big Band Brothers, Michael Spagnol u mistednin oħra, irnexxielu jgħaqqad il-mużika, il-letteratura u l-umoriżmu flimkien. Waqt il-ftuħ uffiċjali tal-attivitajiet tal-Milied f’Għawdex ġew esplorati kemm it-tradizzjonijiet antiki kif ukoll dawk moderni ta’ dak li ħafna jqisu bħala l-isbaħ żmien tas-sena.
Il-Ministru għal Għawdex u l-Ippjanar Clint Camilleri qal li, “Il-programm b’rabta mal-festi tal-Milied jimmarka t-tmiem ta’ sena impenjattiva iżda huwa wkoll il-bidu ta’ sena oħra ta’ ħidma sfiqa fost l-oħrajn fil-qasam kulturali. Il-kalendarju kulturali qiegħed kulma jmur jiġi aktar apprezzat u mfaħħar minn kulħadd u dan ikompli jħeġġiġna sabiex inkomplu b’aktar ħidma biex inwasslulkom attivitajiet ta’ kwalità li tant saru mfittxija matul is-sena kollha.”
Fost l-attivitajiet li hemm ippjanati matul il-ġranet tal-Milied insibu l-Parata tal-Milied li se ssir fil-21 ta’ Diċembru, 2024, fi Triq ir-Repubblika, Victoria, u Dinja tat-Tfal, fit-22 ta’ Diċembru, 2024 fil-ġonna ta’ Villa Rundle l-Belt Victoria. Mill-1 sat-22 ta’ Diċembru fil-ġonna ta’ Villa Rundle se jkun għaddej Christmas Market u mill-1 ta’ Diċembru 2024 sas-6 ta’ Jannar 2025 l-ġonna jkunu mixgħulin – Villa Rundle Illuminated Gardens. Il-presepju ħaj li tant sar sinonimu mal-Għawdxin u dawk kollha li jżuru Għawdex, Betlehem f’Għajnsielem, din is-sena se jiftaħ fil-15 ta’ Diċembru u jdum miftuħ għal bosta ġranet matul Diċembru u Jannar.
Il-qofol jintlaħaq lejlet l-ewwel tas-sena b’kunċert mill-isbaħ mid-9pm ’il quddiem fi Pjazza Indipendenza fir-Rabat, Għawdex bil-parteċipazzjoni ta’ bands u DJs lokali fosthom, The Travellers, Ryan Spiteri & Jolene Samhan u tal-mistiedna internazzjonali Sonique.
Attivitajiet oħra jinkludu Christmas Magic – Għar Ilma, Santa Luċija, Santa’s Workshop f’Ta’ Dbieġi Crafts Village, l-Għarb, u l-Panto Red Riding Hood fit-Teatru Astra. Barra minn hekk, madwar Għawdex se jkunu qed jittellgħu diversi wirjiet u presepji tradizzjonali Għawdxin.
Il-Ministru għal Għawdex u l-Ippjanar Clint Camilleri temm billi rringrazzja lill-voluntiera u lill-parteċipanti kollha li jagħmlu dawn l-attivitajiet possibbli u ħeġġeġ lil kulħadd biex dan il-Milied għal darb’oħra jagħżlu lil Għawdex.
Għal aktar informazzjoni dwar l-attivitajiet li se jittellgħu f’Għawdex wieħed għandu jżur https://eventsingozo.com/christmas-in-gozo-2024/. Il-programm tal-Milied f’Għawdex jista’ jiġi aċċessat ukoll minn https://issuu.com/visitgozo/docs/christmas_2024_booklet
Christmas It’s Time Milied mit-Tliet Għoljiet se jixxandar nhar il-Milied fil-25 ta’ Diċembru fis-6pm fuq TVM.