Marc Overmars irriżenja mill-kariga tiegħu bħala direttur tekniku ta’ Royal Antwerp, b’effett immedjat, minħabba problemi relatati mas-saħħa tiegħu. Overmars, ta’ 56 sena, ħabbar id-deċiżjoni permezz ta’ ittra indirizzata lill-partitarji tal-club u ppubblikata fuq il-midja soċjali ta’ Royal Antwerp.
Fl-ittra tiegħu, Overmars qal li għal diversi ġimgħat kien qed jipprepara biex wara t-tmiem tas-suq tat-trasferimenti jagħti aġġornament dettaljat lill-partitarji dwar il-futur tal-club. Huwa spjega li matul dawn l-aħħar xhur ma tantx kellu kuntatt magħhom u għalhekk kien ippjana li jibda Settembru billi jitkellem magħhom.
Madankollu, Overmars ammetta li l-aħħar sentejn ma kinux faċli u li t-teħid tal-club minn sidien ġodda żied ukoll il-livell ta’ stress. Skont hu, l-għejja akkumulata matul is-snin, flimkien mal-istress kontinwu, waslet għall-qofol tagħha fi tmiem il-ġimgħa li għaddiet.
Overmars qal li bħalissa jinsab kompletament bla enerġija u li t-tobba wissewh li jekk ma jagħtix kas ta’ ġismu hemm riskju għoli ħafna li s-sitwazzjoni tmur għall-agħar.
Għalhekk, huwa ħa d-deċiżjoni drastika li jwaqqaf kompletament l-attivitajiet professjonali tiegħu għal żmien indefinit, sabiex jiffoka fuq saħħtu u l-irkupru tiegħu.
