In-North Sails Twilight Series Pursuit Racing Series waslet fi tmiemha wara kampanja eċċitanti ta’ sitt tiġrijiet, bit-Ton Ton Laferla Insurance ta’ Jonathan Gambin tirbaħ it-titlu overall b’total impressjonanti ta’ 5 punti.
In-North Sails Twilight Series użat format ta’ tiġrijiet pursuit, ibbażat fuq sistema ta’ handicap fejn il-jottijiet jitilqu f’intervalli differenti skont il-klassifikazzjoni tagħhom, bl-aktar dgħajjes b’handicap baxx jitilqu l-ewwel.
L-għan huwa sempliċi: tirbaħ l-ewwel dgħajsa li tkun għadha fuq quddiem meta jiskadi l-ħin. Minflok linja tat-tmiem fiżika, kull tiġrija damet għal perjodu fiss. Skont ir-regoli tas-serje, wara li tlestew is-sitt tiġrijiet ġie skartat riżultat ta’ ġurnata waħda, biex il-kompetituri ngħataw l-opportunità jirkupraw minn riżultat li ma kienx soddisfaċenti jew minn tiġrija li ma setgħux jieħdu sehem fiha.
It-Ton Ton Laferla ta’ Gambin tat prestazzjoni dominanti tul is-serje, fejn rebħet ħamsa mis-sitt tiġrijiet u assigurat ir-rebħa ġenerali b’sensiela ta’ riżultati kważi perfetta. Is-sitt tiġrija kienet ir-riżultat skartat tagħhom, biex għalqu b’total finali ta’ 5 punti li ma setax jintlaħaq.
Il-jott li ta sfida mill-qrib tul is-serje kien Kixx Me ta’ Luis Azzopardi li wkoll ta prestazzjoni konsistenti matul il-kompetizzjoni kollha. Azzopardi spiċċa fit-tieni post f’kull tiġrija li ħa sehem fiha u rebaħ l-aħħar tiġrija, biex temm erba’ punti wara Gambin u kiseb it-tieni post ġenerali b’9 punti.
It-tielet post mar għand Godwin Zammit fuq Inspiration, li għalaq il-podju b’total finali ta’ 23 punt. Zammit kellu prestazzjoni konsistenti ma tul is-serje kollha, fejn spiċċa t-tieni fl-aħħar tellieqa.
“Dan il-format wera li huwa t-tiġrija ideali ta’ nofs il-ġimgħa — aċċessibbli, kompetittiva fuq il-baħar u b’element soċjali wara t-tellieqa. Issa fit-tieni sena tagħha, is-serje stabbiliet ruħha sew fil-kalendarju tagħna, u l-atmosfera fil-bar tal-Club wara kull tiġrija hija xhieda ta’ dan. Nixtiequ nirringrazzjaw lil Mediterranean Yacht Sales, aġenti ta’ North Sails, għall-appoġġ tagħhom, kif ukoll lit-tim tar-Race Management li mexxa t-tellieqa.”
— Adrian Gauci Borda, Rear Commodore (Sailing), Royal Malta Yacht Club
Il-kalendarju tat-tlielaq tar-Royal Malta Yacht Club ikompli f’Settembru bil-Yachting Malta Race Week, li se tinkludi sensiela ta’ attivitajiet bejn il-11 u l-21 ta’ Settembru.
Il-programm, organizzat b’kollaborazzjoni ma’ Yachting Malta Ltd u l-Malta Sailing Federation, jinkludi tellieqa offshore lejn Licata, il- Finductive National Dinghy Championships, kif ukoll tlielaq barra l-kosta.
Għar-raba’ sena konsekuttiva se terġa’ ssir ukoll Steering the Course — inizjattiva organizzata flimkien mal-Vikings Sailing Club, bil-għan li tintroduċi aktar nisa għall-isport tal-ibburdjar u li hija rikonoxxuta kemm mill-Kumitat Olimpiku Internazzjonali kif ukoll minn World Sailing.
