Il-President Amerikan Donald Trump ħabbar fuq Twitter li fid-dawl taċ-ċirkostanzi preżenti, se jiffirma digriet biex jissospendi b’mod temporanju l-immigrazzjoni lejn l-Istati Uniti.
Hu qal li d-deċiżjoni hi motivata minħabba l-attakk mill-għadu inviżibbli tal-Coronavirus. Saħaq li jrid jipproteġi l-postijiet tax-xogħol tal-pajjiż kbir Amerikan.
In light of the attack from the Invisible Enemy, as well as the need to protect the jobs of our GREAT American Citizens, I will be signing an Executive Order to temporarily suspend immigration into the United States!
— Donald J. Trump (@realDonaldTrump) April 21, 2020
Intant, l-eks-viċi President Joe Biden qal li Trump falla milli jaġixxi b’mod rapidu kontra l-pandemija u dan qed jiswa bil-kbir lill-Amerika. Qal li l-President Trump m’għandu ebda interess li jsolvi l-problema jew li jsalva l-ħajjiet tan-nies, u dan hekk kif fl-Istati Uniti hemm l-ogħla rati ta’ mwiet u infezzjonijiet. Barra hekk qal li diġà hemm madwar 22 miljun Amerikan li talbu sussidji minħabba li huma qiegħda.
Fl-aħħar 24 siegħa, fl-Istati Uniti komplew mietu 1,433 persuna minħabba l-Coronavirus. Jidher li s’issa mietu aktar minn 42,000 persuna, filwaqt li ġew infettati aktar minn 784,000 persuna.