Meta ntlagħab it-tieni programm tal-ewwel leg tal-play-offs għall-Aħħar 16 tal-UEFA Champions League, Bayern Munich u Benfica għamlu pass tajjeb għall-kwalifikazzjoni meta rebħu barra minn darhom.
Club Brugge v Atalanta – Club Brugge laqgħu lil Atalanta u kontra kull mistenni ħarġu rebbieħa bl-iskor ta’ 2-1 biex issa l-pressjoni tinsab kollha fuq it-team Taljan hekk kif il-ġimgħa d-dieħla jilagħbu f’Bergamo.
Kien Ferran Jutgla (15) li fetaħ l-iskor għall-Belġjani iżda Mario Pasalic (41) kiseb id-draw għat-team immexxi mill-coach Gian Piero Gasperini.
U meta kollox deher li l-partita kienet se tispiċċa fi draw, fl-94 minuta, Brugge skorjaw il-goal tar-rebħa minn penalty ta’ Gustaf Nilsson wara li l-istess player twaqqa’ minn Isak Hien.
Monaco v Benfica– Barra minn darhom, Benfica għelbu lil Monaco bl-iskor ta’ 1-0 bl-uniku goal tal-partita jasal minn Vangelis Pavlidis (48).
Monaco kellhom lil Moatasem Al-Musrati (52) imkeċċi għal żewġ karti sofor.
Celtic v Bayern M. – Bayern Munich marru l-Iskozja u għelbu lil Celtic bl-iskor ta’ 2-1.
Celtic ħasbu li skorjaw wara 26 sekonda permezz tal-eks player ta’ Bayern, Nicolas Kuhn, iżda Adam Idah ġie senjalat f’pożizzjoni ta’ offside.
Peró, b’mod gradwali l-Bavarjani ħadu l-kontroll tal-logħba u bdew jheddu b’attakk wara l-ieħor … u fil-45 minuta ġustament fetħu l-iskor minn Michael Olise.
Harry Kane (49) irdoppja għal Bayern iżda Daizen Maeda (79) naqqas il-marġni għal Celtic.
Feyenoord v Milan – Feyenoord laqgħu lil Milan u għelbuhom bl-iskor ta’ 1-0.
Huma ma setgħux kellhom bidu aħjar meta wara biss tliet minuti fetħu l-iskor b’xutt ta’ Igor Paixao li spiċċa fis-saqaf tax-xibka.
