Real Madrid …….3
Man City ………..1
(wara l-ħin barrani)
Aggregate: Real Madrid 6-5
Real Madrid huma t- tieni finalisti tal-UEFA Champions League meta fit-tieni leg tat-tieni semi-finali għelbu lil Manchester City bl-iskor ta’ 3-1 wara l-ħin barrani għal aggregate ta’ 6-5.
B’hekk huma se jaffrontaw lil Liverpool fi Stade De France, f’Pariġi, fit-28 ta’ dan ix-xahar … biex din se tkun it-tielet finali bejniethom wara l-1981 u l-2018.
Wara bidu ta’ studju, l-ewwel azzjoni denja waslet, fit-13-il minuta, min-naħa ta’ Real Madrid meta azzjoni mibdija minn Daniel Carvajal, Federico Valverde kompla lejn Karim Benzema li minkejja li kien issikkat minn Ruben Dias, ix-xutt tiegħu għadda ftit millimetri fuq il-mimduda.
Manchester City wieġbu żewġ minuti wara permezz ta’ xutt ta’ Kevin De Bruyne li iżda l-goalkeeper, Thibaut Courtois laqa’ mingħajr diffikultá.
Fit-18-il minuta, il-Madrileni resqu viċin meta Benzema approfitta minn clearance qasira biex żmarka lil Vinicius Junior iżda minn qagħda tajba falla l-mira.
Żewġ minuti wara, wasal l-aħjar ċans għas-Citizens meta Bernardo Silva kkontrolla l-ballun qabel ma venven kanunata iżda daqstant ieħor kien tajjeb Courtois li salva b’mod spettakolari.
Fl-34 minuta, l-Ispanjoli appellaw għal penalty meta Kyle Walker deher jagħmel kuntatt ma’ Vinicius fil-kaxxa iżda r-referee ħalla l-logħob għaddej.
Fl-40 minuta, Thibaut Courtois reġa’ kien providenzjali meta salva xutt perikoluż ta’ Phil Foden minn barra l-kaxxa.
Sekondi mill-ftuħ tat-tieni taqsima, Vinicius seta’ fetaħ l-iskor iżda minn tliet metri bogħod għamel l-impossibbli u falla l-mira.
Mal-ħin, l-Ispanjoli bdew iżidu l-pressjoni li bdiet ġejja minn fuq in-naħa ta’ Kyle Walker li ma setax ilaħħaq mal-ħeffa ta’ Vinicius. Peró kienu wisq erratiċi fil-kaxxa avversarja.
Iżda bil-ħin għaddej, il- frustrazzjoni bdiet tikber fil-kamp ta’ Real minħabba li ma setgħux isibu t-triq lejn ix-xibka avversarja.
U kontra x-xejra tal-logħob, fiit-73 minuta, Manchester City fetħu l-iskor meta azzjoni mibdija minn Bernardo Silva sab l-ispazju biex għadda lejn Riyad Mahrez li b’first-timer għeleb għal kollox lil Courtois.
Kienet mistennija reazzjoni mmedjata minn Real iżda fis-87 minuta, s-City kienu sfortunati meta żewġ tentattivi nfila ta’ Jack Grealish ġew salvati minn Ferland Mendy u Courtois minn fuq il-linja fatali.
Fis-sekondi ta’ wara segwa dak li ħadd ma stenna meta Real Madrid għamlu rimonta u skorjaw darbtejn minn Rodrygo, fid-90 u fit-92 minuta, biex il-partita kellha tmur fil-ħin barrani.
Appena għaddew tliet minuti, Real ingħataw penalty meta Ruben Dias waqqa’ lil Karim Benzema fil-kaxxa u mill-11-il metru l-istess player ma’ falliex.
Fil-105 minuti, Courtois salva fuq Fernandinho minn taħt il-lasti biex evita goal ċert … u salva l-kwalifikazzjoni.
