It-tamiet taċ-Champions League ta’ Rangers jinsabu fid-dubju wara li dawn sfaw megħluba 2-0 minn Union Saint-Gilloise tal-Belġju.
Il-bidu pożittiv tal-viżitaturi evapora meta l-internazzjonali Malti, Teddy Teuma, kellu wisq spazju fil-kaxxa biex jiftaħ l-iskor fis-27 minuta.
Imbagħad, wara verifika mill-VAR meqjusa li Connor Goldson kien mess il-ballun b’idu fil-kaxxa, Dante Vanzeir issiġilla r-rebħa mill-11-il metru fs-67 minuta.
Il-vantaġġ tal-Belġjani seta’ kien ikbar li kieku ma kienx għal save kbir tal-goalkeeper Jon McLaughlin li ċaħħad lil Vanzeir meta ġie wiċċ imb’wiċċ miegħu, filwaqt li James Tavernier ikklerja daqqa ta’ ras minn fuq il-linja fil-ħin miżjud.
Ir-rebbieħa se jiffaċċjaw lil Monaco jew lil PSV Eindhoven għal post fil-fażi tal- gruppi, wara li ż-żewġ timijiet spiċċaw fi draw ta’ 1-1 fl-ewwel leg fi Franza.
Għall-wirja li pproduċa u għall-goal li skorja, Teddy Teuma, ġie magħżul il-Player tal-Logħba, xi ħaġa li tagħti spinta lilu kif ukoll lit-team nazzjonali li tiegħu huwa għażla regolari meta huwa wkoll wieħed mill-aħjar players li għandu għad- dispożizzjoni tiegħu l-coach nazzjonali, Devis Mangia.
