Il-Moviment Graffiti u numru ta’ organizzazzjonijiet oħra llum se jkunu qegħdin jagħmlu dimostrazzjoni fil-11 ta’ filgħodu quddiem il-Kwartieri Ġenerali tal-Pulizija fil-Floriana. Din id-dimostrazzjoni se ssir b’reazzjoni għal dik deskritta bħala “insensittività u nuqqas ta’ għarfien” mill-Pulizija rigward vjolenza abbażi tal-ġeneru li fl-estrem tagħha twassal għall-femiċidju.
Total ta’ 14-il organizzazzjonijiet u gruppi se jingħaqdu mal-Moviment Graffiti f’din id-dimostrazzjoni. Dawn huma: Aditus Foundation, Alleanza kontra l-Faqar, Doctors for Choice Malta, Għajjejt u Xbajt, Integra, Malta Women’s Lobby, Men Against Violence, MGRM, Migrant Women Association Malta, Moviment Graffiti, Women for Women Foundation, Women’s Rights Foundation, YMCA Malta u l-Young Progressive Beings.
Kull min jappoġġja d-drittijiet tan-nisa u l-ugwaljanza bejn is-sessi huwa msejjaħ jingħaqad għal din il-protesta ta’ siegħa fejn se jsiru dawn it-talbiet:
* L-awtoritajiet għandhom jerfgħu r-responsabbiltà tagħhom fil-qasam;
* Jittieħdu azzjonijiet konkreti li jindirizzaw l-isterjotipi, il-misoġinija u l-patrijarkat;
* Tkun indirizzata l-problema li jintefa’ t-tort fuq il-vittma;
* L-istupru, bħala reat, għandu jittieħed aktar b’serjetà; u
* Għandhom jiġu aġġornati l-linji gwida għall-iskejjel fir-rigward tas-sess u tar-relazzjonijiet.