Fil-Grigal tal-Indja, hemm stadium tal-football li għandu storja u tradizzjoni partikolari, iżda li ftit huma dawk li jafuh barra mill-pajjiż. Huwa l-Vivekananda Yuba Bharati Krirangan, magħruf bħala s-Salt Lake Stadium f’Kolkata, jew “Il-Mekka tal-Football Indjan”.
L-istadium, li għandu kapaċità ta’ madwar 85,000 spettatur, darba kien jakkomoda sa 120,000 persuna qabel ma ġie rranġat fl-2014. Huwa meqjus bħala wieħed mill-aktar stadia importanti fl-istorja tal-football Indjan u jinkludi wkoll helipad għall-wasliet tal-VIPs, ġibjuni taħt l-art għall-emerġenzi u sistema li tippermetti li l-wiċċ sintetiku jinbidel għal ħaxix naturali.
Matul is-snin, il-ground ospita diversi mumenti storiċi. Kien hawn fejn Lionel Messi serva bħala captain tal-Arġentina għall-ewwel darba, filwaqt li Diego Maradona lagħab ukoll f’dan l-istadium. Oliver Kahn, il-goalkeeper leġġendarju, lagħab hemm l-aħħar partita tiegħu, f’logħba ta’ tislima kontra Mohun Bagan. L-Ingilterra wkoll rebħet it-Tazza tad-Dinja ta’ Taħt id-19-il sena hemmhekk, b’Phil Foden fit-team.
Fl-2025, l-istadium reġa’ deher fl-aħbarijiet meta Messi żar Kolkata bħala parti mill-“GOAT Tour”. Għadd ta’ partitarji kienu ħallsu sa 12,000 rupee biex jaraw lill-Arġentin, iżda l-preżenza tiegħu ta’ madwar 20 minuta wasslet għal protesti u inċidenti fost il-folla.
Fit-3 ta’ Ottubru, il-Brażil ta’ Carlo Ancelotti lagħbu kontra l-Indja f’wieħed mill-aktar konfronti importanti fl-istorja tal-football Indjan. Estevao skorja u pprovda assist, filwaqt li Samuel Lino skorja darbtejn għal skor finali ta’ 3-0.
