Zinedine Zidane jinsab ħerqan li jerġa’ jingħaqad ma’ Cristiano Ronaldo jekk jieħu r-riedni ta’ Paris Saint-Germain f’idejh fis-sajf.
Mauricio Pochettino qed jiffaċċja futur inċert fit-tmexxija tal-club mill-Parc des Princes, b’rapport riċenti jsostni li l-Arġentin qed jipprepara biex jitlaq qabel l-istaġun 2022-23.
PSG huma maħsuba li identifikaw lil Zidane bħala l-mira numru wieħed tagħhom biex jieħu post Pochettino jekk jitlaq fis-sajf, minkejja l-allegazzjonijiet li l-ex coach ta’ Real Madrid jixtieq imexxi lit-team nazzjonali ta’ Franza.
Madankollu, Zidane jinsab ippreparat biex jieħu t-tmexxija tal-club minn Pariġi u l-ewwel kompitu tal-Franċiż se jkun li jiġbed lil Ronaldo ‘l bogħod minn Manchester United.
Ronaldo jista’ jitħajjar jifforma attakk ma’ Neymar u Lionel Messi fil-Parc des Princes, b’Kylian Mbappe mistenni jiffinalizza free transfer ma’ Real Madrid.
Ronaldo huwa kkuntrattat mar-Red Devils sal-2023 bl-għażla ta’ 12-il xahar addizzjonali, u Manchester United diġà huma maħsuba li qed jippjanaw għat-tluq potenzjali tiegħu, b’Alexander Isak ta’ Real Sociedad immarkat bħala sostitut possibbli.
