Christian Said ta’ 38 sena mill-Fgura ntbagħat sena u erba’ xhur ħabs wara li ammetta li seraq minn żewġ vetturi u pprova jisraq minn tnejn oħra.
Il-każi seħħew bejn is-16 u s-17 ta’ Marzu 2021 f’diversi lokalitajiet fosthom il-Fgura, Ħal Tarxien u l-Floriana. Fost l-oġġetti misruqa kien hemm flus kontanti, dokumenti u anke nuċċali.
Said wieġeb ħati wkoll li kiser il-libertà proviżorja billi naqas milli jħares il-kundizzjonijiet li ġew imposti fuqu u li sar reċediv.
Il-Qorti, preseduta mill-Maġistrat Gabriella Vella, waqt li sabitu ħati u kkundannatu 16-il xahar ħabs, ordnat ukoll il-konfiska ta’ €2,500 favur il-Gvern ta’ Malta u l-arrest mill-ġdid tiegħu.
Il-Prosekuzzjoni tmexxiet mill-Ispetturi Sarah Kathleen Zerafa, Paul Camilleri u Michael Vella.
