Għal sena oħra konsekuttiva, Aġenzija Żgħażagħ tat fondi lil diversi għaqdiet li jaħdmu qatigħ maż-żgħażagħ. Il-fondi mogħtija għall-iskemi A4U u BeActive raw tkabbir kbir, hekk kif laħħqu t-€300,000. Barra minn hekk, qed jiġi nnutat ukoll li żdiedet il-parteċipazzjoni mill-għaqdiet volontarji b’diversi proġetti li jsiru fil-komunità.
Din is-sena b’kollox intlaqgħu 116-il proposta; 71 applikazzjoni għall-iskema A4U, u 45 applikazzjoni għall-iskema BeActive. Minn dawn l-applikazzjonijiet u l-proposti, ġew magħżula 94 għaqda volontarja differenti.
L-għaqdiet magħżula ġew mistiedna għal avveniment fejn ingħataw finanzjament mis-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti flimkien mal-Kap Eżekuttiv ta’ Aġenzija Żgħażagħ is-Sinjura Miriam Theuma, biex tiġi koperta l-ispiża għat-twettiq ta’ dawn l-proġetti.
Fid-diskors tiegħu, is-Segretarju Parlamentari Keith Azzopardi Tanti saħaq dwar l-importanza ta’ skemi simili immirati b’mod partikolari għaż-żgħażagħ. “Huwa importanti li nagħmlu ħilitna sabiex iż-żgħażagħ tagħna jitrawmu dejjem aktar f’vokazzjonijiet ta’ dan it-tip li l-profitt tagħhom mhuwiex wieħed monetarju iżda ta’ sodisfazzjon personali. Permezz ta’ Aġenzija Żgħażagħ, qegħdin nagħtu din l-għajnuna sabiex dawn il-voluntiera li jagħtu ħinhom fil-komunità jkollhom aktar riżorsi biex jaħdmu,” sostna Keith Azzopardi Tanti.
Is-segretarju parlamentari, filwaqt li feraħ lill-għaqdiet kollha li bbenefikaw minn dawn l-iskemi, ħeġġeġ sabiex aktar għaqdiet volontarji taż-żgħażagħ jew li jaħdmu maż-żgħażagħ jinteressaw ruħhom f’dawn l-inizjattivi sabiex ikomplu jkattru l-ġid u l-kontribut tagħhom fis-soċjetà.
Min-naħa tagħha l-Kap Eżekuttiv Miriam Theuma qalet li l-impenn tal-Aġenzija Żgħażagħ hu li tkompli toffri skemi simili u saħqet dwar l-importanza li aktar għaqdiet taż-żgħażagħ jew li dawk kollha li jaħdmu maż-żgħażagħ ifittxu li jibbenefikaw minn dawn l-iskemi ta’ finanzjament.
Il-Kap Eżekuttiv sostniet li “Permezz tal-iskemi A4U u BeActive, fost oħrajn, Aġenzija Żgħażagħ irnexxielha toħloq sistema ta’ katina bejn diversi għaqdiet biex b’hekk ikun hemm aktar kollaborazzjoni, mhux biss mal-Aġenzija nnifisha, iżda anki bejniethom biex b’hekk jitgħallmu u jikbru flimkien, jagħtu sapport lil xulxin, u joħolqu proġetti ikbar u aktar ambizzjużi.”