L-atleta professjonali tal-Muay Thai, Ahweafa Garenne, li rrappreżentat lil Malta, rebħet it-titlu prestiġjuż ‘WMO International Professional Title’ waqt l-avveniment ‘The Roma’ f’Ruma, l-Italja, fl-10 ta’ Ottubru 2026. Hija għelbet lill-Ingliża Sybilla Ulfig, li hija kklassifikata fit-tieni post f’pajjiżha fil-Muay Thai.
Din ir-rebħa tkompli żżid mal-kisbiet impressjonanti ta’ Garenne, li aktar kmieni din is-sena diġà rebħet it-titlu Ewropew professjonali tal-WBC MuayThai. Bi klassifikazzjoni fost l-aqwa 10 atleti nisa fid-dinja fil-kategorija tal-piż tagħha, Garenne issa qed timmira li tikkompeti fuq livell globali, f’avvenimenti bħal RWS u ONE Championship.
F’Ruma, irrappreżentat lil Malta wkoll Miraya Borg, ta’ 17-il sena, li kisbet l-ewwel rebħa internazzjonali tagħha fil-Muay Thai amateur kontra avversarja mill-Ukrajna.
Iż-żewġ atleti jitħarrġu u jikkompetu ma’ ‘Malta Fight Co’ f’Tas-Sliema, u qed ikomplu jirrappreżentaw lil Malta fix-xena internazzjonali tal-Muay Thai.
