Andre Paus m’għadux coach ta’ Birkirkara FC.
Id-deċiżjoni tal-Istripes li jneħħu mill-ex coach ta’ Valletta FC waslet wara taħditiet bejn iż-żewġ partijiet u ntlaħaq ftehim reċiproku biex il-club u Paus imorru triq separata.
Id-deċiżjoni tasal wara li Birkirkara spiċċaw eliminati mill-kwarti tal-finali tal-FA Trophy wara telfa ta’ 3-1 kontra Floriana nhar it-Tnejn.
Jonathan Holland issa se jmexxi lit-team, fosthom fil-konfront tal-Kampjonat Premier League tas-Sibt kontra Floriana.
“Birkirkara FC u l-coach s-Sur Andre Paus qablu b’mod reċiproku li ma jestendux il-kuntratt għall-istaġun li ġej,” qal il-club mill-Premier League fi stqarrija.
“Ġie miftiehem miż-żewġ partijiet li għat-tliet logħbiet li fadal tal-istaġun kurrenti, is-Sur Jonahtan Holland għandu jieħu r-rwol ta’ Head Coach fl-assenza tiegħu.”
“Il-club jixtieq jirringrazzja bis-sħiħ lis-Sur Paus għax-xogħol li sar fl-aħħar tliet staġuni u jawguralu l-aħjar xorti għall-futur tiegħu.”
Birkirkara qed ifittxu li jassiguraw post fl-Ewropa l-istaġun li ġej u bħalissa jinsabu t-tielet fil-klassifika tal-Kampjonat Premier b’40 punt, żewġ punti vantaġġ fuq Hamrun Spartans u tlieta fuq Gzira United.
