Minn Cristian Muscat
Il-leġġendi tal-futbol Antonio Cabrini, Paul Parker u Vincenzo Iaquinta se jkunu f’Malta fit-22 u t-23 ta’ Mejju biex jiltaqgħu ma’ plejers żgħażagħ waqt kamp tal-futbol kif ukoll biex jattendu Gala Dinner b’risq il-karità.
Cabrini huwa eks plejer tal-futbol professjonali u maniġer Taljan ċelebrat, meqjus b’mod wiesa’ bħala wieħed mill-aqwa difensuri tax-xellug fl-istorja Taljana.
Huwa kien figura ewlenija fir-rebħa tat-Tazza tad-Dinja tal-FIFA tal-1982 u gawda karriera ta’ 13-il sena ma’ Juventus, li matulha rebaħ dik li dak iż-żmien kienet magħrufa bħala t-Tazza taċ-Champions, is-Serie A Taljana u diversi titli importanti oħra.
Parker huwa eks plejer tal-futbol professjonali Ingliż u kummentatur sportiv, magħruf l-aktar bħala difensur tal-lemin ewlieni għal Manchester United u l-Ingilterra fil-bidu tas-snin disgħin.
Magħruf għall-veloċità u l-għarfien difensiv tiegħu, Parker kien parti integrali mill-iskwadra tat-Tazza tad-Dinja tal-Ingilterra tal-1990 u rebaħ żewġ titli tal-Premier League u diversi titli domestiċi u Ewropej ma’ United.
Iaquinta huwa plejer tal-futbol Taljan irtirat, magħruf l-aktar bħala attakkant veloċi u fiżiku li kien parti mill-iskwadra Taljana rebbieħa tat-Tazza tad-Dinja tal-2006. Huwa qatta’ l-aqwa snin tiegħu ma’ Udinese u Juventus, fejn skorja aktar minn 100 gowl professjonali mal-klabb qabel ma rtira fl-2013.
Cabrini, Parker u Iaquinta se jieħdu sehem fil-Generations of Glory Dinner li se jsir nhar il-Ġimgħa, 22 ta’ Mejju mis-7.30pm ‘il quddiem fir-Radisson Golden Sands Hotel fil-Mellieħa.
Matul l-avveniment, Cabrini, Parker u Iaquinta se jinteraġixxu mal-mistednin, jitkellmu dwar il-kisbiet tagħhom fit-Tazza tad-Dinja, jieħdu ritratti, u jiffirmaw tifkiriet.
L-għada, it-tliet plejers leġġendarji se jieħdu sehem f’kamp tal-futbol għal żgħażagħ promettenti li se jinteraġixxu ma’ dawn l-istilel tal-futbol dinji u jirċievu pariri mingħandhom biex ikunu jistgħu jkomplu l-vjaġġ tagħhom fil-futbol.
Kull parteċipant se jingħata rigal sabiħ bħala sorpriża. Dan l-avveniment se jsir b’kollaborazzjoni ma’ Hamrun FC Daikin School of Excellence u Ħamrun Hanin u se jkun fil-Victor Tedesco Stadium, u jibda fis-1pm.
It-tliet eks plejers se jkollhom ukoll avveniment ma’ numru ta’ pazjenti li bħalissa jinsabu taħt il-kura ta’ Hospice Malta.
Il-qligħ minn dawn l-avvenimenti se jmur għal Hospice Malta li hija s-Sieħba uffiċjali ta’ Memorabilia for Charity.
Fi stqarrija, Memorabilia for Charity irringrazzjaw lil Visit Malta, il-Lands Department, Infrastructure Malta, Me Direct, Radisson SAS, Lion Security u My Convenience għall-appoġġ tagħhom lejn l-avvenimenti tagħna u talli għamluha possibbli li nospitaw dawn il-leġġendi tal-futbol f’Malta.
Għal aktar informazzjoni dwar l-avvenimenti jekk jogħġbok segwi lil Memorabilia for Charity Malta fuq Facebook u Instagram jew ibgħat email fuq [email protected] jew ikkuntattjana fuq 99896164 jew 77220229.
