Jingħad li xejn mhu inevitabbli fil-ħajja, iżda issa hija ħaġa kważi ċerta li Andy Burnham se jsir il-mexxej li jmiss tal-Partit Laburista u allura Prim Ministru tar-Renju Unit wara r-riżenja ta’ Sir Keir Starmer. Għalkemm għad fadal aktar minn ġimagħtejn qabel ma jinfetħu n-nominazzjonijiet għat-tmexxija nhar il-Ħamis 9 ta’ Lulju, Burnham fil-fatt diġà rebaħ. Huwa l-għażla ċara għall-membri tal-partit Laburista, tant li nhar it-Tnejn, il-Membri Parlamentari Laburisti wrew li se jappoġġjawh b’mod kbir ukoll.
M’hemm l-ebda prospett realistiku li xi kandidat alternattiv jista’ jegħleb lil Burnham f’elezzjoni għat-tmexxija. U kważi m’hemm l-ebda prospett realistiku li xi persuna li tniedi sfida għat-tmexxija tikseb l-appoġġ ta’ 81 Membru Parlamentari u nominazzjoni minn 5% tal-kostitwenzi Laburisti jew, mill-inqas tliet organizzazzjonijiet affiljati li minnhom tnejn iridu jkunu unjins, li jkollhom bżonn biex tkun kandidat.
Minkejja dan, ma waqfux l-ispekulazzjonijiet dwar xi tip ta’ sfida. Huwa possibbli li jkun hemm min jimmaġina xi tip ta’ kompetizzjoni li sseħħ matul il-ġimagħtejn li ġejjin, li tinvolvi kandidati li jiddikjaraw interess fit-tmexxija u jistabbilixxu pjattaforma biex imbagħad jirtiraw għax ma jkollhomx biżżejjed appoġġ.
Il-BBC diġa rrapporta li Darren Jones, is-segretarju ewlieni tal-prim ministru uxxenti Keir Starmer, u Al Carns, l-eks ministru tal-forzi armati, ma eskludewx li jikkontestaw.
Iżda figuri oħra fil-partit Laburist qed jippruvaw jiskoraġġixxu dan it-tip ta’ sfida. Nick Thomas-Symonds, il-ministru għar-relazzjonijiet mal-Unjoni Ewropea, kien beda jagħti intervisti. Huwa kien leali sew lejn Keir Starmer, iżda issa qed jgħid li ried jara lil Andy Burnham isir mexxej u prim ministru u li ried jara tranżizzjoni rapida fit-tmexxija.
Fil-kuntest ta’ dan kollu, Margaret Hodge, eks ministru fil-gvern Laburista, qalet lill-programm televiżiv Today li, filwaqt li tara li hemm każ għal għal kontestazzjoni u elezzjoni għat-tmexxija, iżda b’mod ġenerali taħseb li jkun aħjar li ma ssirx elezzjoni.