Il-belt ta’ Nairobi, fil-Kenja, rebħet il-bid biex tospitaw l-Kampjonati tad-Dinja tal-Atletika tal-2029, u b’hekk se ssir l-ewwel belt Afrikana li qatt tospita din il-kompetizzjoni. Id-deċiżjoni ttieħdet waqt laqgħa tal-kunsill ta’ World Athletics f’Budapest, fejn il-proposta ta’ Nairobi għelbet dik ta’ Londra.
Il-president ta’ World Athletics, Sebastian Coe, faħħar il-proposta Kenjana u qal li kienet waħda “konvinċenti u emozzjonali”. Huwa saħaq li kien importanti li l-kampjonati jaslu fl-Afrika fil-mument it-tajjeb, u li Nairobi wriet li dan kien il-mument tagħha.
Il-bid ta’ Londra kienet tipproponi l-London Stadium bħala l-post ewlieni. Dan l-istadium ospita l-Olimpjadi tal-2012, il-London Diamond League u l-Kampjonati tad-Dinja tal-2017.
Nairobi kienet diġà kandidata għall-edizzjoni tal-2025, iżda tilfet kontra Tokyo. Il-Kasarani Stadium bħalissa qed jiġi rinnovat qabel l-AFCON tal-2027, u dan għen biex tissaħħaħ il-kandidatura tagħha.
Fl-istess laqgħa ġie kkonfermat li Munich se tospita l-edizzjoni tal-2031. L-għażla ta’ Nairobi hija wkoll rikonoxximent tal-qawwa tal-atletika Kenjana, wara li l-Kenja spiċċat it-tieni fit-tabella tal-midalji fl-2025, b’seba’ midalji tad-deheb u 11-il midalja b’kollox.
