“Trid tkun verament żibel biex tikkonfoffa ma’ terzi barra minn Malta biex mara tqila tinġieb f’Malta ħalli tqum il-kontroversja tat-terminazzjoni tat-tqala għax taparsi kienet f’periklu”. Kiteb dan fuq il-profil tiegħu ta’ Facebook l-eks Deputat Nazzjonalista Jason Azzopardi filwaqt li kompla biex jisħaq li dak li kien qiegħed jikteb ma kinitx ipoteżi jew teorija iżda verità oġġettiva fattwali li seħħet.
Min-naħa tagħhom attivisti mill-Fondazzjoni għad-Drittijiet tan-Nisa sostnew li b’wiċċhom minn quddiem li dak li kien qiegħed jgħid Azzopardi ma kienx minnu. Qalu li huma għexu ma’ din il-koppja siegħa b’siegħa dan il-martirju u saħansitra għamlu ljieli ma jorqdux sakemm l-mara kienet sigura fi Spanja.
Huma qegħdin jisfidaw lil Azzopardi biex “jekk inti raġel mhux titfa’ t-tajn u taħbi idejk. Filkas narawk il-Qorti u ġib il-provi li għandek”, temmew jgħidu l-attivisti.