Iż-żewġ timijiet Maltin, Ħamrun SC Beach Soccer u Sliema Beach Soccer, jinsabu lesti biex jirrappreżentaw lil Malta fil-Euro Winners Challenge 2026 li se jsir f’Nazaré, fil-Portugal, bejn illum u l-11 ta’ Ġunju. Dan it-turnew jiġbor flimkien uħud mill-aqwa timijiet tal-beach soccer fl-Ewropa.
Ħamrun SC jibdew l-impenji tagħhom fil-fażi tal-gruppi kontra Kefallinia AO BS illum, filwaqt li għada jiltaqgħu kontra FC Genappe. L-aħħar partita tagħhom tkun kontra t-tim ospitu AD Nazaré 2022.
Min-naħa tagħhom, Sliema Beach Soccer jiftħu l-kompetizzjoni tagħhom kontra Falfala, segwita minn logħba kontra Ecoris u oħra kontra Bavaris Beach, bil-għan li javvanzaw għall-fażijiet eliminatorji tat-turnew.
