Il-Bord tal-Protesti tal-Malta FA ordna li l-konfront tal-BOV National League I bejn Pembroke Athleta u Qrendi FC, li ntlagħab fis-27 ta’ Settembru u spiċċa b’rebħa ta’ 4-2 għal Qrendi, jerġa’ jintlagħab kollu kemm hu wara protesti mressqa miż-żewġ klabbs.
Qrendi kienu ressqu protest fejn talbu li jingħataw rebħa ta’ 3-0, minħabba allegat ksur tar-regolamenti minn Pembroke Athleta. Ir-regolamenti jistipulaw li meta klabb ikollu plejer barrani mhux imrobbi lokalment fil-grawnd, irid ikollu wkoll mill-inqas plejer wieħed imrobbi lokalment, taħt id-19-il sena, jilgħab qabel l-1 ta’ Jannar ta’ qabel il-bidu tal-istaġun.
Qrendi argumentaw li Pembroke Athleta għamlu sostituzzjonijiet li wasslu biex ma baqgħux jissodisfaw dan ir-rekwiżit obbligatorju.
Min-naħa tagħhom, Pembroke Athleta kkontestaw l-ammissibbiltà tal-protest, billi sostnew li dan ma kienx tressaq fit-terminu ta’ jumejn tax-xogħol previst mill-istatut tal-Malta FA. Huma argumentaw ukoll li r-regolament kien ġdid għal dan l-istaġun u li l-ksur kien riżultat ta’ żball amministrattiv ġenwin, aktar milli tentattiv intenzjonat biex jiġu evitati r-regoli.
Il-Bord stabbilixxa li ż-żewġ klabbs kienu kisru l-istess regolament dwar l-eliġibbiltà tal-plejers waqt l-istess partita. Għaldaqstant, ma setax jagħti r-rebħa lil wieħed miż-żewġ timijiet, peress li t-tnejn kienu responsabbli għall-ksur tar-regolamenti. Lanqas ma seta’ jiddikjara l-partita nulla mingħajr ma jingħataw punti lil xi ħadd, għax din il-possibbiltà mhijiex prevista fir-regolamenti.
Fid-dawl taċ-ċirkostanzi eċċezzjonali u wara li ż-żewġ klabbs esprimew ix-xewqa tagħhom li l-partita terġa’ tintlagħab, il-Bord iddeċieda li din kienet l-aktar soluzzjoni ġusta u xierqa.
Il-partita issa se tintlagħab mill-ġdid nhar it-Tlieta 10 ta’ Novembru fis-Sirens Stadium, fit-8.00 pm.
