“Bullying fuq tfal b’diżabbiltà jkompli jurina li hemm bżonn li ma nieqfu qatt nitkellmu fuq diżabbiltajiet differenti.”
Hekk stqarret il-Ministru għall-Inklużjoni, il-Kwalità tal-Ħajja u l-Organizzazzjonijiet Volontarji Julia Farrugia Portelli meta mitluba għall-kumment minn Talk.mt bħala reazzjoni għall-istorja li dan is-sit ippubblika aktar qabel fejn omm allegat li binha mhux jattendi l-iskola minħabba tfal oħra li bdew jagħmlulu ħajtu diffiċli minħabba li jbati bl-awtiżmu.
Min-naħa tagħha l-Ministru Farrugia Portelli qalet li mingħajr ma tidħol fil-mertu tal-każ partikolari, kull tip ta’ bullying hu kundannabbli jsir fejn isir u jsir fuq min isir, aktar u aktar fuq tfal b’diżabbiltà. Il-Ministru sostniet tgħid li l-iskola għandha tkun dak il-post fejn kull tifel u tifla jieħu gost imur fil-vjaġġ edukattiv li jsawwarhom f’żgħażagħ u adulti b’saħħithom.
“Bullying fuq tfal b’diżabbiltà jkompli jurina li hemm bżonn li ma nieqfu qatt nitkellmu fuq diżabbiltajiet differenti. U jkompli jurina kif is-soċjetà f’kull stadju tagħha m’għandha tegħja qatt tippriedka u tgħix bil-fatti l-kelma inklużjoni”, temmet Farrugia Portelli.
Intant il-Pulizija ħabret li bdew jikkolaboraw mal-FSWS sabiex iniedu programm biex ikun hawn aktar għarfien fl-iskejjel dwar bullying. Il-Pulizija tħeġġeġ lit-tfal biex jagħmlu kuraġġ u jfittxu l-għajnuna. Huma jistgħu jagħmlu dan billi jitkellmu mal-ġenituri, mal-edukaturi jew l-amministrazzjoni fl-iskejjel jew anke mal-Pulizija tal-komunità. Il-Pulizija tagħmel dawn l-appelli fi żjarat edukattivi waqt laqgħat fl-iskejjel sabiex it-tfal ikunu infurmati dwar kif jistgħu jfittxu l-għajnuna.
Meta kien qed iwieġeb mistoqsija parlamentari tad-deputat Nazzjonalista Graziella Galea, il-Ministru għall-Intern u s-SIgurtà Nazzjonali Byron Camilleri qal li l-Pulizija rċeviet 18-il rapport dwar każijiet ta’ bullying bejn Jannar 2021 u Jannar li għadda. F’dan ir-rigward il-Pulizija qalet li jekk il-vittmi jibqgħu siekta, huma ma jkunux jistgħu jkunu infurmati bil-każi, u ovjament ma tistax tittieħed azzjoni.
