Anzjan imbikkem wara allegat swat minħabba kwistjoni ta’ pparkjar
Anzjan li sofra ġrieħi f’allegat argument li seħħ ftit tax-xhur ilu u li għażel li jaqsam ma’ dan il-ġurnal l-esperjenza tiegħu qiegħed jappella biex jingħata s-sapport li hemm bżonn. L-anzjan isofri minn kundizzjoni serja u skont ma’ rrakkonta magħna huwa kellu jiddaħħal l-isptar wara li kellu argument minħabba li pparkja l-karozza tiegħu quddiem garaxx.
Ir-raġel ta’ aktar minn 80 sena spjegalna d-dispjaċir tiegħu dwar it-tħaddim tas-sistema u l-proċediment f’tali każi. Dan minħabba li minkejja li allegatament ġie aggredit u midrub, imma l-ġrieħi ma kinux iċċertifikati skont il-gravità fuq l-istess ċertifikat mediku, il-Pulizija qalulu li “ma jistgħux jieħdu passi kontra l-allegat agressur”. Il-vittma tat-terza età, li għadu mbeżża’ u mweġġa’ sostna ma’ Talk.mt li qiegħed jibża’ li mhijiex se ssir ġustizzja miegħu, mentri allega li l-agressur huwa liberu u għadu jiġri fit-toroq “qisu xejn mhu xejn”.
L-anzjan qasam ma’ dan il-ġurnal din l-esperjenza kerha li għadda minnha lejn l-aħħar tas-sena l-oħra. Huwa li għamel snin twal jgħix barra minn Malta u kellu l-isfortuna li jitlef bintu għall-marda kiefra tal-kanċer, ġie lura f’pajjiżna fl-2009. Stqarr magħna li jinsab iddiżappuntat ħafna għall-mod kif isiru l-affarijiet lokalment. Il-kwistjoni kollha jingħad li nqalgħet bejn familjari fil-bogħod fuq parkeġġ quddiem garaxx ta’ wieħed minnhom.
Il-vittma spjegalna kif minħabba saħħtu huwa kien applika għal spazju ta’ parkeġġ għad-diżabbli iżda sakemm dan ġie approvat u attwat, kien ipparkja xi drabi quddiem garaxx partikolari li skontu “ma kienx jintuża”. Huwa allega li darba minnhom sab kimika fuq il-karozza tiegħu li kienet quddiem l-imsemmi garaxx u għalkemm issuspetta li kienet vendikazzjoni, billi ma rax b’għajnejh, għażel li jħalliha tgħaddi.
Argument li evolva fi vjolenza
Fil-jum tal-inċident li fih l-anzjan allegatament safa attakkat minn raġel ieħor iżgħar fl-età, il-vittma mar għall-karozza li kienet ipparkjata quddiem dan il-garaxx.
L-anzjan allega li s-sid, “irrabja u beda jgħajjat. Ibbuttani u ħallieni fuq il-bankina. Kelli d-demm ma’ ħalqi u ħallieni bla nifs. Ħsibtni li se mmut. Ma stajtx naqbad il-mowbajl biex inċempel lill-Pulizija u għall-għajnuna. Imbagħad kien hemm tfajla u ġew tal-ambulanza. Dħalt Mater Dei fl-4.30 p.m u domt hemm sat-3.30 a.m tal-għada”.
Mir-rapport tal-isptar li wriena hemm miktub li l-anzjan kellu d-demm ħiereġ mill-ħanek u li sofra ferita superfiċjali f’saqajh. Ta’ dawn anke wriena r-ritratti li qegħdin nippubblikaw. Huwa qalilna li sarlu anke x-ray ta’ dahru minħabba l-waqgħa. L-anzjan ikompli li minn dakinhar tal-allegat attakk il-kundizzjoni ta’ saħħtu marret lura ħafna.
L-anzjan stqarr magħna li għadu mbeżża’ u dan hekk kif skontu dakinhar tal-allegat attakk, ma kienx l-unika darba li kien ġie mhedded mill-istess persuna.
“Allura, kieku qatilni mbagħad kienu jieħdu passi?”
“Li għamel għamlu biex jaqbad miegħi. Lill-Pulizija qalilhom li jien żlaqt mentri dan mhux minnu għax konna wiċċ imb’wiċċ nargumentaw. Il-Pulizija qaluli li rrid immur il-Qorti biex nagħmillu garanzija personali għax huma ma jistgħux jipproċedu kontrih. Dan minħabba li ma sofrejtx ġrieħi gravi. Allura, kieku qatilni mbagħad kienu jieħdu passi?” staqsa l-anzjan.
L-anzjan ikompli li fl-istat ta’ saħħa li jinsab fih ma jiflaħx għall-ġiri tal-Qorti u li jaqta’ qalbu anke biex sempliċiment imur sal-Belt Valletta. Spjega kif fil-pajjiż Ewropew li kien jgħix fih l-affarijiet ma jsirux bħalma jsiru hawn u li l-attakki fuq il-persuni, b’mod speċjali fuq l-anzjani, jittieħdu b’serjetà kbira. L-anzjan qal li huwa sofra dak li jissejjaħ “grievious bodily harm” (ħsara fiżika gravi) għax il-każ tiegħu kien attakk fuq anzjan li weġġa’ u ħariġlu d-demm, kif ukoll baqa’ mweġġa’.
“Bniedem suppost jiġi avviċinat mill-forzi tal-ordni. Jien ġejt imsawwat. Mhux suppost iħalluh jiġri barra. Lanqas biss ħaduh l-għassa,” sostna jgħidilna. L-anzjan ikompli li ma jistax ikun li l-attakki vjolenti bla ħniena fuq il-persuni, b’mod speċjali fuq anzjani morda, ma jiġux indirizzati mill-awtoritajiet.
“Għalkemm jista’ jkun hemm nuqqas ta’ qbil bejn persuni, dan ma jfissirx li għandu jkun hemm vjolenza u li jekk isseħħ il-vjolenza, dan huwa reat u min jirrikorri għall-vjolenza għandu jiffaċċja l-ġustizzja”, temm jappella l-anzjan.
Il-Pulizija bdew bl-investigazzjonijiet
Dan is-sit irrefera dan il-każ lill-kelliem tal-Pulizija, Brandon Pisani, li infurmana li l-Korp jaġixxi fuq kwalunkwe allegazzjonijiet kriminali li jiġu għall-attenzjoni tiegħu.
L-anzjan qalilna li hu ppreżenta ċ-ċertifikat mediku mill-Isptar Mater Dei lill-Pulizija u li kien fil-fatt identifika lill-agressur. Hawnhekk staqsejna jekk f’każi ta’ agressjoni, il-Pulizija tipproċedix kontra l-allegat agressur fi kwalunkwe każ ta’ agressjoni jew inkella f’dawk ta’ natura gravi jew serja biss. Tlabna kjarifika dwar dan il-punt u spejgazzjoni aħjar dwar il-proċedura u dak li tgħid il-liġi.
Pisani fir-risposta tiegħu qalilna li dwar il-każ imsemmi, il-Pulizija rċeviet rapport, bdew l-investigazzjonijiet bil-partijiet kollha ġew mitkellma mill-Pulizija u mistennija jinħarġu akkużi skont il-liġi. Madankollu huwa kkjarifika li l-Pulizija timxi dejjem skont il-liġi u biex ikunu jistgħu jitteħdu passi, fiċ-ċertifikat ippreżentat lilha jrid ikun hemm ċertifikazzjoni medika tal-gravita tal-ġrieħi li abbażi tagħhom tkun tista’ tipproċedi kontra l-aggressur.
Huwa temm jgħid li bħal kull każ, meta jkun hemm proċeduri fil-Qorti kemm vittmi, kif ukoll xhieda oħra, jintalbu jidhru quddiem il-Qorti biex jagħtu x-xiehda tagħhom.
