Bayern Munich ipproduċew wirja mill-aqwa meta għelbu lil RB Leipzig bl-iskor konvinċenti ta’ 6-1 fl-Allianz Arena biex reġgħu telgħu fil-quċċata tal-klassifika tal-Bundesliga.
Luis Diaz kien il-protagonista ewlieni tal-partita, hekk kif skorja tripletta u ispira liċ-champions renjanti għal rebħa kbira. Il-Kolumbjan fetaħ l-iskor fit-12-il minuta, qabel ma Aleksandar Pavlovic irdoppja għall-Bayern fit-26 minuta. Michael Olise żied it-tielet goal fit-34 minuta biex Bayern daħlu jistrieħu b’vantaġġ komdu ta’ 3-0.
Diaz kompla jżid mal-iskor ftit wara l-bidu tat-tieni taqsima, filwaqt li Harry Kane għamilhom 5-0 fit-53 minuta, f’dik li kienet il-100 dehra tiegħu fil-Bundesliga. Diaz issiġilla t-tripletta personali tiegħu fid-69 minuta biex temm wirja mill-aqwa. Andrija Maksimovic skorja l-goal ta’ konsolazzjoni għal Leipzig fil-ħin miżjud.
B’din ir-rebħa, Bayern Munich telgħu fil-quċċata tal-klassifika tal-Bundesliga b’14-il punt, bl-istess ammont ta’ punti daqs Borussia Dortmund, iżda b’differenza aħjar ta’ goals.
