Jintqal li kull reliġjon hi mibnija fuq dommi ta’ twemmin li għalkemm ma jistgħux jiġu ppruvati jew sostnuti “xjentifikament” iridu jiġu aċċettati b’għajnejn magħluqa. Ċertament, kif tistqarr hi nnifisha, l-fidi Kattolika hi waħda minn dawn ir-reliġjonijiet.
Ma hemm l-ebda argument li jista’ jkun validu b’mod “assolut” kontra jew favur li taqbel ma’ domma. Il-libertà personali ta’ kull persuna għandha tkopri d-dritt li din taċċetta kwalunkwe domma li jipproponulha. Li hu xieraq (għalkemm aktar delikat) madankollu hu li ċ-ċittadini jkollhom il-mezzi biex jagħrfu li x’qed jiġi pproponut lillhom hu domma.
Fil-fatt hu hawn li l-Knisja Kattolika tibbrilla għax b’mod onest tirrikonoxxi fejn il-proposti tagħha huma dommi.
F’oqsma oħra tal-ħajja dan ma jiġrix. Pereżempju, mhux rikonoxxut li dawn l-istqarrijiet huma jew jistgħu ikunu dommi:
–Fil-gwerra ta’ Putin fl-Ukrajna, ir-Russja ġġorr it-tort kollu.
–Bid-dħul tagħha fl-Unjoni Ewropea, Malta rebħet benefiċċji kbar u kważi xejn żvantaġġi.
–Il-Maltin huma kontra r-razziżmu u ma jittollerawhx.
KULĦADD JAF LIL KULĦADD
Li dal-pajjiż hu ċkejken ħafna hu fatt evidenti. Li dan joħloq ċertu dwejjaq għal min jgħix hawn qatt għalhekk ma għaġġeb lil ħadd. Din il-kondizzjoni dejjem kienet hawn, taħt kull reġim.
Żgur m’għandhiex x’taqsam mal-istorja li ż-żgħażagħ iridu jitilqu jgħixu x’imkien ieħor malajr kemm jistgħu. Jew għandha?
Għax ċerti stejjer li niġu mitmugħa donnhom iridu jgħidu li dix-xewqa ta’ żgħażagħ li jirrispondu lill-kwestjonarji li jsirulhom hi kkawżata llum miċ-ċirkostanzi attwali tal-ħajja taħt gvern Laburista.
Hi l-ispin li jagħtu apoloġisti tal-Oppożizzjoni għar-realtà li f’sitwazzjoni bħal tagħna, fejn kulħadd jaf lil kulħadd, iż-żgħażagħ jaspiraw għal soċjetà nieqsa mill-kontrolli soċjali żejda, jew li jinħassu hekk. Hekk kien jiġri wkoll fiż-żmien meta kont żagħżugħ.
TRID TIRREPETI
Intrigatni r-reazzjoni ta’ ħabib tiegħi meta għedtlu kemm stagħġibt li xi ħaġa li kont għedt mat-tliet snin ilu u tennejt wara, meta erġajt għedtha issa, tqieset bħala xi “aħbar” ġdida.
Int bis-serjetà qed titkellem? staqsa. Mela ma tafx li bil-firxa wiesgħa ta’ mezzi tal-kumnikazzjoni li għandna ġrat ħaġa stramba? Minflok l-informazzjoni dwar li jinsab għaddej tilħaq lil kulħadd, din qed tinxtered ma’ diversi kanali ta’ kumnikazzjoni. Frazzjoni ċkejkna tas-soċjetà qed tinduna b’xinhu jintqal tassew, anke mill-Gvern jew mill-Oppożizzjoni. Il-biċċa l-kbira tal-pajjiż taf jew iżżomm f’moħħha parti biss mill-messaġġi li jkunu qed jitwasslu. Dak li jibqa’ fil-memorja ta’ min ikun sema’ x’aktarx li ssibu kontaminat.
–Allura xi trid tagħmel biex twassal messaġġ sempliċi?
–Tirrepeti, tirrepeti, tirrepeti, weġibni.
