Skont tbassir riċenti tan-Nazzjonijiet Uniti, madwar 50 miljun ruħ oħra x’aktarx se jispiċċaw ibatu minn ġuħ kbir qabel tmiem is-sena d-dieħla minħabba s-sistema tat-temp magħrufa bħala El Niño li qed tiżviluppa b’mod mgħaġġel. Dan l-ammont jiżdied mal-mijiet ta’ miljuni ta’ nies li diġà qed jiffaċċjaw livelli għoli perikolużi ta’ ġuħ, kawża ta’ snin ta’ nixfa f’partijiet mill-Afrika u l-pressjoni fuq il-prezzijiet tal-ikel li rriżultat mill-gwerra fl-Iran.
Anke jekk il-fenomenu mbassar ta’ El Niño jirriżulta li huwa inqas qawwi milli qed jiġi mbassar, xorta waħda se jwassal lil ħafna pajjiżi f’sitwazzjoni kritika u dan iżid aktar minn ħamsa mal-225 miljun ruħ f’45 pajjiż li bħalissa qed jesperjenzaw nuqqas akut ta’ sigurtà fl-ikel, hekk kif wissa l-Programm Dinji tal-Ikel (WFP) tan-Nazzjonijiet Uniti nhar l-Erbgħa.
Skont l-analiżi, l-aktar reġjuni li x’aktarx se jintlaqtu ħażin huma l-Amerika Ċntrali u t’Isfel, il-Karibew u n-Nofsinhar tal-Afrika. Fin-Nofsinhar u fix-Xlokk tal-Asja, x’aktarx se tinżel inqas xita mis-soltu, fatt li jikkawża problemi serji għall-agrikoltura u għall-bdiewa.
L-El Niño ta’ din is-sena – sistema tat-temp li tifforma kull ftit snin fl-Oċean Paċifiku u ġġib magħha bidliet fix-xejriet tax-xita madwar id-dinja – jidher li se jkun l-aktar wieħed qawwi tal-inqas f’70 sena. Xi wħud qed isejħulu “super El Niño”, għalkemm dan it-terminu mhuwiex rikonoxxut uffiċjalment.
Dak li hu ċert hu li l-impatti u l-qawwa tiegħu qed jiġu affettwati bil-kbir mill-kriżi klimatika. Aktar kmieni din is-sena, esperti qalu li fenomenu qawwi ta’ El Niño jista’ jaġixxi flimkien mat-tisħin globali biex iwassal għall-aktar sena sħuna li qatt ġiet irreġistrata, jew din is-sena stess jew, aktar probabbli, fl-2027.
Esperti tat-tbassir diġà wissew dwar l-impatt li l-fenomenu El Niño – li qed jiżviluppa bħalissa – se jkollu fuq il-prezzijiet globali tal-ikel madankollu, ir-rapport ippubblikat mill-WFP huwa l-ewwel wieħed li jeżamina fid-dettall il-kwistjoni tal-ġuħ madwar id-dinja.
Il-WFP stqarr li jittama li jtaffi l-effetti ta’ dawn il-kundizzjonijiet estremi tat-temp permezz ta’ sistemi ta’ twissija bikrija u miżuri ta’ għajnuna proattivi, li għalihom ġie allokat baġit ta’ mill-inqas $80 miljun.
Il-konsegwenzi xorta waħda se jkunu estensivi, hekk kif il-bdiewa jistgħu jdumu aktar minn staġun wieħed biex jispiċċaw ir-riżervi tal-ikel tagħhom. Fin-Nofsinhar tal-Afrika, pereżempju, l-istaġun ewlieni tal-kultivazzjoni jestendi minn Ottubru ta’ din is-sena sa Marzu tal-2027; madankollu, l-agħar impatti se jinħassu madwar disa’ xhur wara, matul l-istaġun ta’ skarsezza li jsegwi l-ħsad.
Matul il-fenomenu El Niño tal-2015-16, bejn 60 u 100 miljun ruħ kienu affettwati minn nuqqas akut ta’ sigurtà tal-ikel – terminu li l-WFP juża biex jiddeskrivi stat ta’ ġuħ li għadu ma laħaqx il-livell ta’ ġuħ katastrofiku.
Dak iż-żmien, il-WFP kien għadu ma bediex jimplimenta l-miżuri aġġornati tiegħu ta’ azzjoni antiċipatorja għalhekk, l-esperti tiegħu jittamaw li l-kundizzjonijiet estremi tat-temp ta’ din is-sena jkollhom impatt inqas gravi, anke jekk il-fenomenu El Niño jkun aktar qawwi.
Id-dejta tal-WFP tkopri l-45 pajjiż fejn topera l-organizzazzjoni u li għalihom huma disponibbli stimi bażiċi dwar l-insigurtà tal-ikel. Jista’ jkun hemm impatti addizzjonali lil hinn minn dawn iż-żoni milquta serjament.
Il-prezzijiet tal-ikel jistgħu jiffaċċjaw pressjoni madwar id-dinja, kif ukoll fil-45 pajjiż eżaminat, Dan jiddependi wkoll mid-deċiżjonijiet li jieħdu l-pajjiżi esportaturi.
