Għexieren ta’ eluf ta’ persuni ġew evakwati filwaqt li mijiet ta’ djar spiċċaw inqerdu f’nirien kbar li qed jaħkmu lill-istat ta’ Colorado ġewwa l-Istati Uniti.
Nirien kbar qed jinfirxu b’mod mgħaġġel ġewwa Boulder County fit-Tramuntana ta’ Denver fejn l-uffiċjali mhux qed jeskludu li jkun hemm imwiet jew persuni li jsofru ġrieħi serji. Fl-aħħar sigħat kien hemm madwar 30,000 persuna – fil-bliet ta’ Louisville u Superior – li ngħataw parir biex jitilqu minn djarhom. Fid-dawl ta’ dan kollu, il-gvernatur tal-istat, Jared Polis, iddikjara stat ta’ emerġenza.
Meta kien qiegħed jitkellem mal-midja f’konferenza tal-aħbarijiet Polis qal li, “dawn in-nirien huma forza tan-natura, aħna nittamaw li r-riħ ibatti u t-temp jinbidel. Lil dawk li qed jiġu affettwati aħna ngħidulhom li mhux se nħallukom waħedkom.”
Ir-riħ ta’ 105 mili fis-siegħa qiegħed ikompli jikkomplika s-sitwazzjoni hekk kif kawża tiegħu n-nirien qed ikompli jinfirxu. Uħud min-nirien żvolġew wara li r-riħ qawwi qaċċat arbli li jżommu l-wires tad-dawl.
