It-team nazzjonali tal-Eswatini wasal Malta llum wara nofsinhar permezz ta’ titjira diretta minn Dubai biex nhar il-Ħamis jilgħab partita ta’ ħbiberija kontra t-team nazzjonali Malti.
Din mhux l-ewwel darba li t-team Malti se jilgħab kontra avversarji mill-Afrika, tant li f’Awwissu tas-sena 2011 t-team Malti kien lagħab partita oħra ta’ ħbiberija kontra ċ-Central African Republic u dak inhar Malta kienet ħarġet rebbieħa bl-iskor ta’ 2-1 bil-goals tal-Maltin jaslu t-tnejn minn Michael Mifsud.
Din hija l-ewwel darba li t-team ta’ Eswatini se jkun qed jilgħab fl-Ewropa kontra pajjiż mill-konfederazzjoni tal-UEFA, bil-player l-aktar rappreżentattiv ikun Sabelo Ndzinisa li rrapreżenta lill-pajjiżu għal 78 darba u li jlgħab ma’ Green Mamba fil-Premier League ta’ Eswatini.
Minn sorsi uffiċjali huwa mifhum li l-Eswatini huma tim fiżikament b’saħħtu iżda ma jippossjedux xi teknika partikolari. Madanakollu fir-rankings tal-FIFA jinsabu biss 4 postijiet wara Malta u dan iħalli x’jifhem li l-logħba tal-Ħamis se tkun waħda kompetittiva.
Għalhekk din se tkun sfida tajba għall-players Maltin tal- coach Emilio De Leo, qabel it-team nazzjonali Malti jaffronta lil Ġibiltá fl-aħħar partita mill-UEFA Nations League nhar it-Tnejn li ġej fil-Victoria Stadium ġewwa Ġibiltá.
It-team Malti jonqsu punt wieħed biex jaċċerta mill-ewwel post fil-grupp u jekk dan iseħħ ikun temm l-impenji tiegħu f’dan il-grupp mingħajr telfa.
L-għażla tal-avversarji, li hija kemmxejn insolita, waslet mir-relazzjonijiet tajba li għandu l-president tal-MFA, Bjorn Vasallo fost il-pajjiżi Afrikani membri tal-konfederazzjoni CAF.
Iżda min verament huma Eswatini?
Eswatini, li qabel kienet magħrufa bħala Swaziland, huwa pajjiż żgħir mingħajr kosta li jinsab fin-Nofsinhar tal-Afrika, bejn l-Afrika t’Isfel u Mozambique.
Il-pajjiż għandu popolazzjoni ta’ madwar 1.2 miljun ruħ u kiseb l-indipendenza mir-Renju Unit fis-6 ta’ Settembru 1968. Il-kapitali amministrattiva hija Mbabane, filwaqt li Lobamba hija ċ-ċentru rjali u leġiżlattiv.
It-team nazzjonali tal-football tal-irġiel huwa magħruf bħala Sihlangu Semnikati, li tfisser “It-Tarka tar-Re”.
It-team huwa affiljat mal-FIFA u mal-Konfederazzjoni Afrikana tal-Football (CAF), u jikkompeti fil-kompetizzjonijiet internazzjonali u reġjonali Afrikani.
Eswatini għadhom qatt ma kkwalifikaw għall-fażi finali tat-Tazza tad-Dinja tal-FIFA jew tat-Tazza tan-Nazzjonijiet Afrikani.
Madankollu, it-team kiseb it-tielet post fit-tournament reġjonali COSAFA Cup fl-2016 u fl-2021.
Il-konfront ta’ ħbiberija kontra Malta se jipprovdi lit-team ta’ Eswatini opportunità biex jikseb esperjenza internazzjonali kontra avversarji Ewropej, filwaqt li jkompli jħejji ruħu għall-impenji kompetittivi li jmiss.
Din il-partita għandha wkoll sinifikat storiku għal Eswatini, peress li se tkun l-ewwel darba li t-team nazzjonali jilgħab partita ta’ ħbiberija kontra pajjiż Ewropew.
L-akbar rebħa li rreġistraw kienet kontra Djibouti bl-iskor ta’ 5-0, fid-9 ta’ Ottubru, 2015, filwaqt li l-akbar telfa li sofrew kienet ta’ 10-0 kontra l-Eġittu, nhar it-22 ta’ Marzu, 2013.
Bħalissa huma kklassifikati fil-164 post fir-rankings tal-FIFA filwaqt li tinsab fil-160 pożizzjoni.
