It-tieni tifun f’ġimgħa. Żoni miċ-Ċina qegħdin jesperjenzaw għargħar kbir fejn mill-inqas żewġ miljun persuna kellhom jiġu evekwati.

It-tifun “Bavi” qiegħed jolqot żona ta’ 1,000 kilometru u kawża ta’ dan qiegħed iħalli ħerba sħiħa minn kull fejn jgħaddi. Nhar is-Sibt li għadda l-ewwel żoni li ntlaqtu kienu n-naħat tal-belt ta’ Taizhou u aktar ma beda jgħaddi l-ħin aktar beda jolqot aktar postijiet.

Ritratti u filmati li qegħdin fuq il-midja soċjali juru ħerba sħiħa, toroq li spiċċaw xmajjar u nies jibku wara li tilfu kulma kellhom. L-awtoritajiet Ċiniżi kienu ilhom li ħarġu twissijiet liċ-ċittadini biex kulħadd jitlaq minn daru, iżda eluf kbar ta’ persuni għażlu li jinjoraw l-istess twissijiet u baqgħu fir-residenzi.

Il-membru tas-salvataġġ Ċiniżi għaddejjin fi ġlieda kontra l-ħin biex isalvaw kemm jista’ jkun persuni fosthom dawk li nqabdu fi djarhom u anke persuni li nġarru mill-ilmijiet kbar li kien hemm.

Skont it-tbassir tat-temp, il-maltemp fis-sigħat li ġejjin se jkun qiegħed jimxi lejn il-Lvant ta’ Anhui u lejn il-baħar l-Isfar.

Il-Gvern Ċiniż qal li f’Zhejiang u provinċji oħrajn fil-qrib, ġew evakwati aktar minn 1.7 miljun persuna li kollha qegħdin jingħataw kenn f’postijiet apposta li tħejjew mill-awtoritajiet.

Ġie ordnat ukoll li l-iskejjel jingħalqu kollha, ħadd ma jmur għax-xogħol kif ukoll kull attivitajiet li kienu ppjanti jitħassru. Aktar minn hekk, madwar 400 titjira li kellha tasal jew titlaq mill-provinċja bejn is-Sibt u l-Ħadd kellha titħassar.

Fil-belt ta’ Wenzhou matul il-ġurnata tal-bieraħ bdew aktar evakwazzjonijiet. Hu stmat li f’din il-belt hemm jgħixu madwar għaxar miljun persuna. It-tħassib tal-membri tas-salvataġġ hu fejn se jibagħtu lil dawn il-miljuni kollha ta’ nies u aktar minn hekk kemm se ddum biex is-sitwazzjoni terġa’ lura għan-normal wara li jgħaddi l-maltemp.