Minn Cristian Muscat
Kif bdiet l-imħabba tiegħek lejn il-blackball?
Immur lura għas-sena 2013 meta għaqqadna l-ewwel tim tal-billiard ġewwa l-klabb tal-boċċi ta’ Birkirkara. Kien minn hemm li għoġbitni ħafna l-logħba u inġbidt lejn il-blackball. Minn dak inhar sal-2019 bqajt attiv kemm bħala plejer, kif ukoll għamilt sentejn membru fil-kumitat, fejn kont nieħu ħsieb it-trofej, gerijiet u ġieli anke t-titjiriet għal meta mmorru nikkompetu barra minn xtutna. Peró, imbagħad kien fil-bidu tal-2019 meta tfajt in-nomina tiegħi fejn urejt ix-xewqa li nieħu ħsieb it-tim tal-irġiel. Niftakar li din kienet intlaqgħet tajjeb ħafna kemm mill-kumitat, kif ukoll mill-plejers. Minn hemm kien beda l-irwol il-ġdid tiegħi, li jinvolvi responsabbilta` kbira li bħal ma nagħmel f’kollox, ħadt b’serjeta kbira.
Iddeksrivi r-rwol tiegħek bħala kowċ tal-blackball.
Ir-rwol ta’ kowċ tat-tim tal-irġiel huwa impenjattiv ferm. Ibda biex, trid issegwi ir-ranking turnaments li jiġu organizzati mill-Federazzjoni biex minnhom jintgħażlu l-plejers għal man-Nazzjonal. Jien inħobb inkun preżenti kemm jista’ jkun biex b’hekk inkun nista’ nosserva lill-plejers aktar mill-viċin u tidra aktar is-sistema ta kull player. Wara l-aħħar ranking turnament li jfisser li jkun ingħaqad it-tim, jiżdied aktar ix-xogħol u jissoktaw il-preparamenti tal-aħħar fejn fost oħrajn nibdew inżidu t-taħriġ għal kważi kuljum. Waħda mill-aktar fatturi li nemmen li hija important, hija li inżomm kemm jista` jkun it-tim magħqud, u li mentalment il-plejers ikunu sereni u kollha ppreparati mija fil-mija. Meta mbagħad jibda l-logħob uffiċjali, trid toqgħod attent għal kull kolp tal-plejers u għal-logħba, biex il-bidliet isiru tajbin u eżatt fil-ħin opportun.
X’unuri maġġuri rbaħt fil-karriera tiegħek bħala kowċ?
Mill-2019 sal-lum, it-tim ta l-irġiel taħt it-tmexxija tiegħi ħadna sehem f’żewg kampjonati tal-Ewropa, li wieħed minnhom ġie organiżżat ġewwa pajjiżna mill-Malta Blackball Federation, u ieħor ġewwa l-Ingilterra. Ħadna sehem ukoll f’żewg kampjonati tad-dinja li għal darb’oħra wieħed minnhom ġie organizzat f’Malta mill-Federezzjoni u ieħor fi Franza. Fl-erbgħa li huma irnexxilna naslu sal-finali illi sfortunatament tlifnihom kollha! Iżda mhi faċli xejn biex fl-ogħla livell fejn nilgħabu kontra plejers professjonali, tasal sal-finali. Apparti dawn ikkompetejna wkoll f’erba` kampjonati tan-Nazzjonijiet li spiċċajna tnejn minnhom fil-kwarti tal-finali u tnejn oħra fis-semi finali. Li nista’ ngħid hu, li l-livell tal-plejers Maltin huwa tal-istess livell bħal plejers barranin li xogħolhom huwa pool biss.
Kif tqis il-livell tal blackball f’pajjiżna fil-preżent, u kif rajtu jinbidel tul is-snin?
Il-livell tal-blackball f’pajjiżna nista’ ngħid li kiber ħafna matul is-snin. Meta wieħed iħares lura, jista jara kemm kibret u żviluppat il-logħba taħt it-tmexxija tal-president Philip Gatt flimkien mal-membri tal-kumitat. Eżempju wieħed huwa il-live streaming. Illi bis-saħħa t’hekk stajna naslu anke ġewwa d-djar tan-nies u min ma jkunx jista jattendi biex isegwi l-logħob fis-sala, illum għandu il-faċilita kolla biex isegwi minn ġewwa d-dar. Grazzi wkoll ghall-entitajiet governattivi illi kienu ta’ għajnuna kbira kemm biex tikber il-logħba u anke biex tiġi mmodernizzata. Tinduna wkoll li l-livell dejjem qed jikber b’mod mgħaġġel, meta tħares lejn tfal ta’ eta` żgħira illi jirbħulek unuri maġġuri fejn eżempju għandna champions tal-Ewropa u tad-dinja kemm fl-individwali u anke bħala timijiet fil-kategoriji rispettivi tagħhom.
Kif qed tħares lejn il-futur tiegħek bħala kowċ tal-blackball?
Bħalissa għaddejjin ranking tournaments fejn baqa’ jintlagħab l-aħħar wieħed biex jiġu magħżula it-timijiet li se jkunu qed jirrapreżentaw lil Malta f’April li ġej ġewwa l-Ingilterra fejn se nikkompetu fil-kampjonat tan-Nazzjonijiet, fosthom it-tim tal-irġiel, immexxi minni. Nista ngħid illi l-preparamenti diġa bdew anke għall-fatt li diġa nafu min huma l-ewwel erba` plejers, u fi ftit jiem oħra inkunu nafu min se jkunu t-tlieta l-oħra. Inħares ‘il quddiem li dejjem naħdem ma’ plejers stabbiliti u forsi oħrajn li tkun l-ewwel esperjenza tagħhom man-Nazzjonal. Eżatt kif naslu lura Malta f’April, jibdew il-preparamenti mill-ewwel għal Kampjonati Ewropej li se jsiru f’Novembru 2025 ġewwa Ennis l-Irlanda.
Għaddi messaġġ finali lil min jixtieq jagħmel karriera ta’ suċċess fil-blackball.
Nixtieq ngħaddi messaġġ lil kull min jixtieq jersaq ‘il quddiem u jiskopri aktar il-logħba tal-Blackball biex ma jiddejjaqx jagħmel dan. Il-logħba tagħtik ħafna opportunitajiet fejn anke tiltaqa’ ma’ nies u tagħmel ħbieb ġodda. Il-ġenituri li jixtiequ jrawmu lit-tfal tagħhom, nissuġġerilhom li javviċinaw lil xi membru tal-Federazzjoni u jitolbu aktar informazzjoni. Fil-logħba tal-Blackball m’hemmx etajiet. Infatti jibdew minn taħt il-15-il sena u saħansitra jibqgħu telgħin ‘il fuq minn 60 sena. Il-billiard huwa sport sabiħ ħafna li anke kapaċi jaljenak mill-intoppi li tista’ toffri l-ħajja ta kuljum.
