Raġel sofra ġrieħi serji wara li lbieraħ għall-ħabta tal-4:30 p.m kien involut f’inċident li seħħ f’impjant fil-limiti tal-Magħtab, fin-Naxxar.
Mill-investigazzjoni li saret irriżulta l r-raġel, li għandu 42 sena u joqgħod il-Qrendi, kien sofra xi ġrieħi wara li nqabad bejn gaffa, li kienet qed tinstaq minn raġel ta’ 53 sena residenti l-Mellieħa, u makkinarju industrijali.
Fil-post issejjaħ tim mediku u ambulanza li ħadet lir-raġel lejn l-Isptar Mater Dei b’urġenza għal aktar kura.
Il-Maġistrat tal-Għassa Dr Claire Stafrace Zammit ġiet infurmata bil-każ u ħatret inkjesta.
L-investigazzjonijiet tal-Pulizija u tal-Awtorità għas-Saħħa u s-Sigurtà Fuq il-Post tax-Xogħol għadhom għaddejjin.
