Is-sewwieq Brittaniku, George Russell (Mercedes), rebaħ il-Grand Prix ta’ Azerbaijan wara li żamm lil Max Verstappen tal-Red Bull warajh fl-aħħar dawriet. Russell kellu kontroll tat-tellieqa fl-ewwel fażi, filwaqt li Verstappen, li kien beda mit-tmien post, beda javvanza u sas-seba’ dawra kien diġà tela’ fit-tielet post.
Oscar Piastri tal-McLaren beda mit-tielet post u tela’ fit-tieni post fil-bidu, iżda ma kellux il-pass biex isegwi lil Russell. Verstappen eventwalment qabeż lil Isack Hadjar u kompla jersaq lejn il-karozzi ta’ quddiem.
Fl-24 dawra, Alex Albon tal-Williams ħabat f’Turn Five u ħarġet l-ewwel Safety Car. Wara li ssoktat it-tiġrija, Verstappen qabeż lil Piastri f’Turn One biex tela’ fit-tieni post.
Madankollu, ftit wara seħħ inċident ieħor fl-ewwel kantuniera, meta Franco Colapinto tal-Alpine ħabat ma’ sieħbu Pierre Gasly, li spiċċa f’kuntatt ma’ Lando Norris. Żewġ Racing Bulls ukoll ħabtu bejniethom, u s-Safety Car reġgħet ħarġet.
Dan ta lil Verstappen l-opportunità li jsegwi lil Russell mill-qrib għall-aħħar 11-il dawra. Russell ma setax jinqata’ minn Verstappen, iżda l-Olandiż qatt ma rnexxielu jersaq biżżejjed biex jipprova jaqbżu.
Fl-aħħar dawra, Valtteri Bottas ħabat bil-Cadillac tiegħu u Russell tilef parti mill-qawwa elettrika wara li kellu jnaqqas minħabba l-bandieri sofor. Verstappen resaq viċiċn, iżda Russell baqa’ jippersisti sal-aħħar u rebaħ b’distakk żgħir ta’ 0.196 sekondi.
Din kienet l-ewwel rebħa ta’ Russell mill-Grand Prix tal-Awstrija f’Ġunju. Sadanittant, sieħbu Kimi Antonelli għamel rimonta mill-16-il post sal-ħames post, u b’hekk naqqas id-distakk tiegħu ma’ Russell fil-klassifika tal-kampjonat għal 66 punt.
Il-klassifika hija (ta’ fuq): 302 – Kimi Antonelli; 236 – George Russell; 199 – Lewis Hamilton; 186 – Lando Norris; 179 – Charles Leclerc; 163 – Max Verstappen; 120 – Oscar Piastri
