Ir-raba’ ġimgħa tal-Enemed Women’s Futsal League rat lil Birkirkara FC jitilfu l-ewwel punti tal-istaġun wara draw ta’ 1-1 kontra University of Malta Futsal. Birkirkara issa għandhom għaxar punti minn erba’ logħbiet, filwaqt li l-Università telgħu għal seba’ punti.
Iċ-champions renjanti Zero Sei kisbu t-tielet rebħa konsekuttiva tagħhom meta għelbu lil Parr Mela Rockets 7-4. B’dan ir-riżultat, Zero Sei telgħu għal disa’ punti minn tliet logħbiet, punt biss taħt Birkirkara, u għadhom l-uniku tim b’rekord perfett fil-kompetizzjoni.
Pietà Hotspurs kisbu rebħa ta’ 2-1 kontra Birżebbuġa St Peter’s, biex telgħu għal sitt punti minn tliet logħbiet. Birżebbuġa, min-naħa tagħhom, għadhom mingħajr punti wara tliet konfronti.
Fil-klassifika, Birkirkara jinsabu fl-ewwel post b’għaxar punti, segwiti minn Zero Sei b’disa’, University of Malta b’sebgħa u Pietà Hotspurs b’sitta. Mġarr United għandhom tliet punti, filwaqt li Birżebbuġa St Peter’s u Parr Mela Rockets għadhom mingħajr punti.
Zero Sei jinsabu f’pożizzjoni li jaqbżu lil Birkirkara jekk jirbħu l-logħba li għandhom inqas, hekk kif it-tellieqa għall-ewwel post qed issir aktar interessanti.
Intant, Daisy Paula Reino ta’ University of Malta tinsab fil-quċċata tal-klassifika tal-iskorers b’ħames gowls, segwita minn Marie Shania Spiteri ta’ Birkirkara b’erbgħa. Andrea Martin Alsono ta’ Zero Sei, Valentina Laura Moreno Alsono ta’ Pietà Hotspurs u Alejandra Jany Cordero ta’ Parr Mela Rockets għandhom tliet gowls kull waħda.
