Il-Belt Valletta hija patrimonju ta’ storja u arkitettura unika. Belt kapitali li tul is-snin rat tibdil kbir kemm fl-infrastruttura kif ukoll fid-dinamika tagħha. Lokalità bieżla u ħajja matul il-ġurnata u grazzi għal investiment li sar f’dawn l-aħħar snin, ingħatat il-ħajja anke filgħaxijiet. Din il-lokalità ta’ kuljum tilqa’ fiha eluf ta’ nies imma nies li jibqgħu fid-djar residenzjali fi tmiem il-ġurnata huma ftit.
F’dawn l-aħħar deċenji, il-Belt rat tnaqqis konsidervoli fil-popolazzjoni tagħha. Minn ċensiment wara l-ieħor naraw kif il-popolazzjoni tnaqqret. Fil-fatt, bejn l-2011 u l-2021 in-numru tal-Maltin residenti fil-Belt Valletta naqas b’aktar minn 10% filwaqt li l-popolazzjoni residenti barranija f’għaxar snin żdiedet b’434%. Dan meta kien hemm żmien li n-numru tar-residenti fil-belt kapitali Maltija kien jaqbeż l-20,000 persuna. Illum hemm ftit iktar minn 5,000. Hawn wieħed ma jistax ma jistaqsix għaliex ir-residenti fil-Belt qegħdin jonqsu daqshekk.
Fatturi li jistgħu jwasslu għal tnaqqis ta’ popolazzjoni huma ħafna. Fost dawk ewlenin hemm il-valur tal-proprjetà li jagħmel l-akkomodazzjoni f’lokalità inqas affordibbli għar-residenti fit-tul. Il-Belt Valletta, bħal kull kapitali oħra fid-dinja, rat żieda qawwija fil-prezzijiet tal-proprjetà kemm tax-xiri kif ukoll tal-kiri. Fattur ieħor huwa tkabbir ekonomiku u l-bidla fil-livell tal-għixien. Fil-Belt insibu ħafna uffiċini, ħwienet, lukandi u akkomodazzjonijiet turistiċi oħra, kif ukoll numru konsiderevoli ta’ stabbilimenti tal-ikel u x-xorb. Dawn jattiraw influss ta’ nies u turisti iżda jaffettwaw il-ħajja ta’ komunità. Tant huwa hekk li l-Belt illum il-ġurnata huwa aktar imfittex bħala ċentru ekonomiku u turistiku milli lokalità residenzjali. Dan il-fattur wassal għal bidla demografika.
Preżentement ir-residenti tal-Belt għandhom quddiemhom diversi sfidi. Dan huwa espress minn għaqdiet volontarji u anke f’laqgħat tar-residenti li jsiru minn żmien il-żmien. Hemm aċċenn għal diffikultajiet ta’ proprjetà aċċessibbli, ħajja urbana movimentata, negozju attiv kemm matul il-ġurnata u issa wkoll bil-lejl, kif ukoll popolazzjoni li qiegħda dejjem tixjieħ. Meta ġenerazzjonijiet iżgħar jitilqu mil-lokalità u jħallu warajhom popolazzjoni li qiegħda tixjieħ, ir-rati tat-twelid ikunu aktar baxxi u dan jikkontribwixxi għat-tnaqqis fil-popolazzjoni. Dawn il-fatturi jwasslu għal implikazzjonijiet soċjali fosthom it-telf tal-wirt kulturali uniku u t-tradizzjonijiet, sens ta’ appartenza għall-istess residenti u awtentiċità lokali. Elementi li fl-aħħar mill-aħħar jagħmlu lokalità, f’dan il-każ il-Belt Valletta, dik li hi.
Filwaqt li nirrikonoxxu l-pożittiv fl-investiment ekonomiku u negozju, nemmnu li hemm bżonn ta’ bilanċ għas-sostenibbiltà u l-preservazzjoni tal-karattru uniku tal-komunità Beltija. Hemm bżonn ta’ bilanċ bejn żona residenzjali u żona turistika-urbana. Huwa tajjeb li jkun hemm ġenerazzjoni ta’ negozju u postijiet ta’ divertiment iżda, il-Belt mhiex il-Belt mingħajr il-Beltin. Quddiem dan kollu naraw il-ħtieġa li l-komunità Beltija tiġi msaħħa u dan billi jkun hemm indirizzar ta’ dan it-tnaqqis rikorrenti fil-popolazzjoni. Dan jeħtieġ approċċ bilanċjat li jonora l-istorja rikka tal-Belt filwaqt li jrawwem futur sostenibbli u inklussiv għar-residenti kollha.
Soluzzjonijiet possibbli jistgħu jkunu inizjattivi għal aktar djar affordibbli, programmi ta’ preservazzjoni kulturali u ppjanar urban inklussiv. Dan l-ippjanar u żvilupp għandu jsir b’tali mod li jkun ta’ benefiċċju għall-komunità Beltija bil-parteċipazzjoni attiva tagħhom stess. B’hekk nistgħu naslu biex din il-komunità terġa’ tibda tikber u tiżdied fin-numri. Hekk nassiguraw li l-Belt Valletta żżomm l-identità vera tagħha, il-karatteristiċi u t-tradizzjonijiet sbieħ li dejjem kellha.
